Túrkistanda eski úıdi buzý oqıǵasyna qatysty ákimdik túsinikteme berdi
TÚRKІSTAN. QazAqparat - 2019 jylǵy 30 qańtarynda aqparattyq portaldarda «V Týrkestane edva ne sneslı dom, v kotorom nahodılıs lıýdı» atty materıalǵa oraı Túrkistan qalasy ákimdigi túsinikteme berdi, dep habarlaıdy QazAqparat.
Materıaldaǵy shaǵymdanýshylar Túrkistan qalasy Rabıǵa Sultan begim kóshesiniń 12/1 úıin jaldap turǵan azamattar, bul úıde zańdy tirkelmegen.
Atalǵan úıdiń zańdy ıesi Omarov Muhamedjan óz úıin memleket muqtajdyǵy úshin berýge baǵalaý qunymen (9 mln 656 myń teńge) kelisip, tıisti ótemaqy memleket tarapynan esep shotyna aýdarylǵan. Úı 1970 jylǵy japsarlas tıpti salynǵan. Turǵyn jaı 82 sharshy metrdi quraıdy. Jer kólemi - 0,0063 ga.
Kelisim bergen zańdy ıesi M.Omarov úıdiń buzylatyndyǵy týraly jaldap turǵan otbasyǵa aldyn ala birneshe kún buryn eskertken.
Sonymen qatar, 2019 jylǵy 29 qańtar kúni osy úıdiń japsarlasy R.Sultan begim 12/2 úı (ıesi Oglaı Allabergenova úıi 11 mln 392 myńǵa baǵalanǵan, qarjysyn alǵan) buzyla bastaǵanda 12/1 úıdiń turǵyndaryna eskertilgen. Úı buzylmaı turyp, turǵyndardyń kóshýine jáne basqa úı jaldaýyna ákimdik tarapynan qarjylaı kómekte berilgen. Biraq osy jaǵdaılardy eskermesten atalǵan úıdiń turǵyndary kórshilerimen uıymdasyp, jaǵdaıdy óz betinshe ýshyqtyryp telearna shaqyryp, uıaly telefonǵa túsirip, áleýmettik jelilerge salǵan.
Sondaı-aq, telearna túsirilim jasap jatqanda, turǵyn úıdi jaldap turýshy Jandos Narymbaıdyń anasy «qan qysymym kóterildi» dep, jedel járdem shaqyrǵan. Kelgen jedel járdem avtokóligine otyryp, jarty joldan óz erkimen túsip qalǵan.
«Túrkistan qalasy ákiminiń orynbasary T. Musaev atalǵan meken-jaı boıynsha turatyn páter jaldaýshylarmen sóılesip, túsindirý jumystaryn júrgizdi. Turǵyn úıdi buzý jumystary arnaıy tehnıkanyń kómegimen emes (býldozer emes) jumysshy adamdardyń kómegimen qolma-qol buzylǵan. Búgingi tańǵa R.Sultan Begim 12/1, 12/2 úıler tolyǵymen buzylyp, materıaldary turǵyndardyń suranysy boıynsha tıisti meken jaıǵa jetkizilip berildi», - delingen ákimdik habarlamasynda.
