Túrkistanda erekshe qamqorlyqtaǵy 35 qyzǵa merekelik syılyqtar berildi
TÚRKІSTAN. QazAqparat - Túrkistanda erekshe qamqorlyqtaǵy 35 búldirshinge arnaıy merekelik syılyqtar berildi, dep habarlaıdy QazAqparat tilshisi.
Túrkistan qalasynyń ákimi Nurbol Turashbekov ońaltýdyń jeke baǵdarlamasymen qamtylǵan 35 qyz balany arnaıy quttyqtap, syı-sııapat jasady.
«Balanyń bóteni bolmaıdy» degen qala ákimi erekshe qamqorlyqtaǵy búldirshinderdiń analaryna alǵysyn aıtty.
«Álemdegi beıbitshilikti saqtaıtyn eń uly kúsh - analardyń tilegi jáne júrektegi meıirim. Biz meıirimdi bolýdy Sizderden úırenemiz. Ómirdiń syn-saǵattaryna synbaı, alǵa umtylystaryńyz, erteńge degen úmitterińiz - qaırat pen jigerdiń úlgisi. Búgingi basqosýymyzdy paıdalanyp, men ár birińizge shynaıy rızashylyǵymdy bildirgim keledi» - dedi qala ákimi.
Merekelik keshte búldirshinderdiń kóńilin ertegi keıipkerleri kóterip, túrli oıyndar uıymdastyrdy. Táttiler úlestirilip, oıynshyqtar taratyldy.
Al, Halyqaralyq áıelder merekesine oraı qalada uıymdastyrylǵan is-sharada Qazaqstannyń eńbek sińirgen ártisi Nurlan Ónerbaev ánnen shashý shashty. Merekelik jıynǵa kommýnaldyq salada jáne áleýmettik júıede jumys istep júrgen kelinshekter men kópbalaly analar qatysty.
