Túrkistanda epıdemıologııalyq jaǵdaı turaqty
TÚRKІSTAN.QazAqparat – Túrkistan qalasynda epıdemıologııalyq jaǵdaı turaqtanyp, koronavırýs ınfektsııasynyń ekinshi tolqynyna daıyndyq sharalary júrip jatyr.
Bul týraly búgin Óńirlik kommýnıkatsııalar qyzmetinde ótken brıfıngte qalalyq ortalyq aýrýhananyń bas dárigeri Janbolat Dildábekov málimdedi, dep habarlaıdy QazAqparat tilshisi.
Bas dárigerdiń sózinshe, pandemııa kezinde 250 tósek oryndyq karantındik statsıonarda 849 patsıent emdelgen. Sondaı-aq, 16 patsıent provızorlyq statsıonarǵa aýystyrylǵan.
«Pandemııa kezinde qalada 320 tósek oryndyq provızorlyq statsıonarda 1384 patsıent jazylyp shyqty. Covid-19 koronavırýs ınfektsııasyna PTsR taldaýyna oń nátıje bergen 88 naýqas ınfektsııalyq gospıtalǵa aýystyryldy. Al, 50 tósek oryndyq ınfektsııalyq gospıtalda Covid-19 ınfektsııasynan 56 naýqas jazylyp shyqty. Qaıtys bolǵandar tirkelmedi», – dedi bas dáriger.
Sondaı-aq, aýrýhanada epıdemııaǵa qarsy is-sharalarǵa tartylǵan medıtsına qyzmetkerleriniń ishinen koronavırýs ınfektsııasyn juktyrǵan 11 adamǵa, onyń ishinde 8 dárigerge Memlekettik áleýmettik saqtandyrý qorynan bólinetin bir rettik áleýmettik tólem retinde eki mıllıon teńgeden tólengen. Búginde oblystyq qoǵamdyq densaýlyq saqtaý basqarmasy tarapynan COVID-19-dyń aldyn alý jáne emdeý boıynsha is-sharalardyń (A,B,V,G) jospary bekitilgen. Іndettiń ekinshi tolqynyna baılanysty 250 tósek oryndyq provızorlyq statsıonar men «Aqmaral» klınıkasynda 70 tósek oryndyq provızorlyq statsıonar, barlyǵy 320 tósek oryndyq provızorlyq statsıonar ashýǵa tolyq múmkinshilik bar.
