Túrkistanda eńbek zańnamasyn buzǵandarǵa 18 mln teńge aıyppul salyndy
TÚRKІSTAN. QazAqparat - Túrkistan oblysynda ótken jyly eńbek zańnamasyn buzý boıynsha 1635 azamattyń aryz-shaǵymy qaralyp, barlyǵyna zańmen belgilengen merzimde jaýap berildi. Bul týraly oblystyq Eńbek ınspektsııasy jónindegi basqarmasynyń basshysy Almasbek Mamytbekov aıtty, dep habarlaıdy QazAqparat tilshisi.
Aımaq basshysynyń aldynda 2018 jyly atqarǵan jumystary týraly esep bergen basqarma basshysynyń sózinshe, aryzdardyń basym bóligi Saryaǵash, Maqtaaral, Saıram aýdandary men Túrkistan qalasyna tıesili bolǵan. Basqarma tarapynan qaralǵan isterdiń 38 paıyzy jalaqy tóleý merziminiń buzylýy, 23 paıyzy eńbek shartyn buzý, 12 paıyzy eńbek demelysyn ýaqytyly bermeý, 5 paıyzy jumys ýaqytynyń normasyn buzýǵa qatysty bolǵan.
«Júrgizilgen tekserýlerdiń nátıjesinde 641 zań buzýshylyq anyqtaldy. Eńbek zańnamasynyń buzylýy boıynsha 18 783 050 teńge kóleminde aıyppul salyndy. Salynǵan aıyppuldardyń somasy ótken jylmen salystyrǵanda 0,9 mln teńgege, ıaǵnı 4,8 paıyzǵa kemigen», - dedi Almasbek Mamytbekov.
Sondaı-aq, óńirde eńbek ınspektorlarymen shetel kapıtalynyń qatysýymen tirkelgen mekemelerde 8 tekserý júrgizilgen. Sheteldik kompanııalarynyń qatysýymen 29 zańbuzýshylyq faktileri anyqtalǵan. 2 laýazymdy jáne zańdy tulǵaǵa 408 850 teńge kóleminde aıyppul salynyp, 4 laýazymdy tulǵaǵa eskertý túrinde ákimshilik shara kórilgen.
