Túrkistanda eń úlken saýda, oıyn-saýyq ortalyǵy ashylady

TÚRKІSTAN. QazAqparat - Túrkistan oblysynyń ákimi Janseıit Túımebaev oblys ortalyǵynda birqatar nysandardy aralap kórdi, dep habarlaıdy QazAqparat tilshisi.

Aımaq basshysy áýeli «Túrkistan ındýstrıaldy aımaǵynda» ornalasqan jıhaz fabrıkasyna bardy. Jobanyń jalpy quny - 364 mln teńgeni quraıdy. Búginde onda 120 adam jumyspen qamtylyp otyr. Shıkizatty Reseıden alatyn nysan jylyna 150-170 mln teńgeniń jıhazyn jasaıdy. Qazir fabrıka jıhazdyń 40-qa jýyq túrin shyǵarýda.
 

Odan ári oblys ákimi jalpy aýmaǵy 15 myń sharshy metr bolatyn  «Megacity» saýda, oıyn-saýyq kesheniniń qurylysymen tanysty. Nysannyń jalpy quny 2 mlrd teńgeni quraıdy. Munda aldaǵy ýaqytta 200 adam jumyspen qamtylady, táýligine 800 adamǵa qyzmet kórsetiledi. Bes qabatty keshenniń árbir qabatynda túrli bólimder ornalaspaq.
  

Keshenniń atqarýshy dırektory Azamat Mamedjanovtyń aıtýynsha, keshende úlken sýpermarketter, kıim dúkenderi, oıyn-saýyq alańdary men kınoteatr ashylady. Nysan Túrkistan qalasynyń turǵyndary men qonaqtary úshin aǵymdaǵy jyldyń jeltoqsan aıynda ashylady dep kútilýde.

Aıta keteıik, bul shahardaǵy eń úlken saýda, oıyn-saýyq ortalyǵy bolady.