Túrkistanda eksportty damytý baǵytyndaǵy alǵashqy front-keńse ashyldy
«Qazaqstan Úkimeti barlyq aımaqtarda ınvestorlardy súıemeldeý boıynsha front-keńseler qyzmetin júzege asyrý erejesin bekitken bolatyn. Atalmysh tásil ınvestordyń qujat jınaý jáne daıyndaý protsesine qatysýyn azaıtý jáne olardyń memlekettik organdarmen tikeleı baılanysyn shekteýdi kózdeıdi. Qazirgi ýaqytta óńirde bıznesti damytý, ınvestorlar úshin qolaıly jaǵdaı jasaý, eksporttyq áleýetti arttyrý jáne týrızmdi damytý baǵyttaryna basa nazar aýdarylýda», - delingen oblys ákimdigi taratqan habarlamada.
«TURKISTAN INVEST» front-keńsesi ınvestorlardy tartý jáne súıemeldeý, sondaı aq eksportty damytý jumystaryn atqarady.
«Qazirgi ýaqyt ınvestorlar jáne eksporttaýshylarmen jumys júrgizýdiń jańa tásilin talap etedi. Investıtsııa jáne eksport paralleldi túrde damýy tıis baǵyttar. Sebebi sheteldik ınvestorlardy tarta otyryp, eksporttaýshylar úshin álemdik naryqqa jańa jol ashylady. Osylaısha, elimizdiń eksport geografııasyn aıtarlyqtaı keńeıtý múmkindigi paıda bolmaq. Osynyń negizinde óńirde aımaqtyq ekonomıkany damytý saıasatyn ázirleıtin Investıtsııalar jáne eksport basqarmasy quryldy. Sondaı-aq osy eki baǵytty «bir tereze» rejiminde jumys isteıtin front-ofıske biriktirý tıimdi», – deıdi Túrkistan oblysy ákiminiń orynbasary Meıirjan Myrzalıev.
Sonymen qatar, ınvestıtsııalardy tartý tetikteriniń tıimdiligin arttyratyn biryńǵaı ınvestorlar bazasy quryldy.
Búgin Túrkistan oblysynyń front-ofısi óńirdiń ekonomıkalyq áleýetine taldaý jasady. Onyń negizinde basym ınvestıtsııalyq baǵyttar anyqtalyp, tyń jobalar ázirlendi. Nátıjesinde, jalpy somasy 106,9 mlrd teńgege 11 joba daıyndaldy. 86 ınvestıtsııalyq jobadan turatyn tizbe ázirlendi. Olardyń jalpy quny 338 mlrd teńge. Atalǵan jobalardyń ishinde 4 317 jańa jumys ornyn ashýǵa múmkindik beretin somasy 179 mlrd teńgege 43 joba 2019 jyly júzege asyrylady. Onyń ishinde quny 53,1 mlrd teńgeni quraıtyn 6 joba sheteldik kapıtal qatysýymen iske asyrylýda. Bul jobalar jumyssyz júrgen 443 azamatty jumys ornymen qamtamasyz etetin bolady.
Sheteldik ınvestorlar jáne eksporttaýshylardyń qolaılylyǵy úshin qajetti aqparatty qamtıtyn jáne front-ofıspen jumys barysyn aıqyn bolýyna negiz bolatyn biryńǵaı saıt daıyndalýda.
Statıstıka málimetterine sáıkes, Túrkistan oblysynyń negizgi kapıtalyna salynǵan ınvestıtsııalar kólemi 2019 jyldyń 5 aıynda 87,3 mlrd teńgeni qurady. Bul 2018 jyldyń sáıkes kezeńimen salystyrǵanda 129,8% joǵary.
Eksportty damytý boıynsha da kóptegen jumystar atqarylǵan. Eksport geografııasy boıynsha taldaý jasalynyp, barlyq múmkin tosqaýyldar men sheshimder anyqtaldy. Sonyń negizinde eksporttaýshylardyń biryńǵaı bazasy jasaldy.
Qazirgi «Tsıfrlyq Qazaqstan» memlekettik baǵdarlamasy boıynsha búkil ekonomıka tsıfrlyq formatqa aýysqandyqtan, aımaqta ShOB damytýdyń negizgi faktory bola alatyn «Turkestan Digital Trade» kóp fýnktsıonaldy tsıfrlyq saýda alańy iske qosyldy.
Statıstıkaǵa sáıkes, Túrkistan oblysynyń óńdelgen eksporttyq ónimderiniń kólemi 2019 jyldyń 6 aıynda 342,3 mln AQSh dollaryn qurap, 2018 jyldyń sáıkes kezeńimen salystyrǵanda 132,5% artty.
Aıta ketý kerek, front-ofıs táýlik boıy jumys isteıdi. Keńsede qońyraý shalý ortalyǵy (call-center: 20-14) jumys isteıdi, baılanys qolaılyǵyn arttyrý maqsatynda mobıldik qurylǵy arqyly baılanys ornatylady.
