Túrkistanda ekobazar ashyldy
Atalǵan joba áleýmettik mańyzy bar azyq-túlik taýarlary baǵasyn turaqtandyrýǵa baǵyttalǵan. Jáne óndirýshilerdiń ónimderin deldalsyz tikeleı satý júıesin qalyptastyrady. Sonymen birge, ekobazar – týrızmdi damytýǵa baǵyttalǵan jol. Óıtkeni avtovokzal janynda, halyqaralyq áýejaıǵa barar jolda ornalasqan saýda kesheninde Túrkistan óńiriniń barlyq ónimderi usynylady.
Merekelik jármeńkege 50-ge jýyq taýar óndirýshiniń 411 tonnadan astam aýyl sharýashylyǵy ónimderi bazar narqynan 15-20 %-ǵa tómen baǵada usynyldy. Atap aıtsaq, 55 tonna et pen et ónimderi, 148 tonna kókónis jáne ózge de taýarlar ákelingen.
Naýryz merekesi Túrkistandaǵy «Jibek joly» saıabaǵynda da uıymdastyryldy. Munda qazaq mádenıeti men rýhanııatynan syr shertetin is-sharalar ótkizildi. Eńseli kıiz úıler tigilip, qolóner sheberleriniń kórmesi ótip, qazaqtyń ánderi shyrqaldy. Ulttyq sport túrleri nasıhattalyp, oıyndar oınaldy. Óńirdiń estrada juldyzdarynyń kontserttik baǵdarlamasy usynylyp, naýryz jyrlary jyrlandy. Naýryz kóje taratyldy. Ómirzaq Shókeev jurtshylyqty merekemen quttyqtap, tarıhı Túrkistannyń keleshegi jarqyn bolaryna senimdi ekenin jetkizdi.
Úsh jyldan astam ýaqyt ishinde júzege asqan jobalarǵa toqtalyp, Jańa Qazaqstandy qurý baǵytyndaǵy betburystardy baıandady. Memleket basshysy Qasym-Jomart Toqaevtyń qoldaýymen Túrkistandy Túrki áleminiń ortalyǵyna aınaldyrý jumystary jalǵasyp jatqanyn málimdedi.
