Túrkistanda Darmen qosymshasy tanystyryldy
TÚRKІSTAN. QazAqparat – Túrkistan oblysynda tótenshe jaǵdaıdy eskertetin Darmen qosymshasy tanystyryldy, dep habarlaıdy QazAqparat oblysy óńirlik kommýnıkatsııalar qyzmetine silteme jasap.
«Elimizdiń turǵyndarynyń qaýipsizdigi úshin «Darmen» mobıldik qosymshasy iske qosylyp otyr. Ol daýyldy gıdrometeorologııalyq qubylystar, seısmıkalyq qaýiptilik qaterler, qysqy kezeńde avtomobıl joldarynyń jabylýy týraly halyqty ýaqytyly habardar etýge múmkindik beredi. «Darmen» mobıldi qosymshasy «Play market» jáne «App store» júıelerinde qoljetimdi», - dedi óńirlik kommýnıkatsııalar qyzmetinde ótken brıfıngte Túrkistan oblysy TJD basqarmasynyń basshysy Baqytjan Zaparov.
Túrkistan oblysynda 2018-2019 jylǵy jylytý maýsymynda oryn alǵan jaǵdaılardy eskerip bıylǵy jyly jylytý maýsymynda ýly gazdan ýlanýdyń aldyn alý jumystary maýsym aıynan bastalǵan bolatyn.
«Departamenttiń bastaýymen oblystyq deńgeıde quramynda ákimdik ókilderi men polıtsııa qyzmetkerleri bar eki top quryldy. Atalǵan toptar 16 aýdan, 32 eldi mekende gazdan ýlanýdyń aldyn alý jáne jazǵy maýsymda sýǵa shomylý qaýipsizdigi jóninde jalpy sany 5 myńnan asa adamdy qamtyǵan úgit-nasıhat jumystaryn júrgizdi. Kópbalaly jáne turmys jaǵdaıy tómen otbasylardyń qaýipsizdigin qamtamasyz etý maqsatynda oblystyq ákimdiktiń qoldaýymen 34 389 úıge gazosıgnalızator ornatýǵa qarjy qarastyrylǵan bolatyn. Búgingi kúnge 16 myńnan astam úıge osy qondyrǵy ornatyldy. Qazirgi tańda Otyrar, Qazyǵurt, Báıdibek, Tóle bı, Saıram, Maqtaaral, Túlkibas aýdandarynda qurylǵyna ornatý jumystary tolyq aıaqtalyp, qalǵan aýdandar aıaqtaý ústinde», – dedi B. Zaparov.
Sonymen qatar, oblysta 384 adamnan turatyn 78 top qurylǵan. Bul is-sharaǵa 92 erikti stýdent jumyldyryldy. Bul quram 8 520 úıdi aralap, nátıjesinde 3127 úıdiń pesh qondyrǵysy jóndelgen. Sondaı-aq, 3 015 úıdiń elektr júıesi retke keltirilip, 2 490 úıdiń murjasy tazalandy.
Oblys turǵyndary jylytý maýsymynyń aldynda órt qaýipsizdiginiń erejelerin saqtap, aldyn alý jumystaryn júrgizý qajet. Atap aıtqanda, kómir-aǵash jáne gaz peshterin tekserý, tútin murjasyn kúıeden tazartý, murjadaǵy barlyq tesikti biteý, pesh esigin tekserý, tútin shyǵarǵyshtardyń jaı-kúıin tekserý úshin bilikti mamandardy úıge shaqyrý, elektr symyn tekserý, elektr jelisin, sonymen qatar jelige birneshe turmystyq tehnıkany qospaý kerek.
