Túrkistanda dárigerler baýyryn qurt basqan júkti áıeldi sharanasymen birge aman alyp qaldy
TÚRKІSTAN. QazAqparat - Bosaný merzimi kelgen jıyrma alty jastaǵy júkti áıel Túrkistan oblystyq klınıkalyq aýrýhanasyna aýyr halde jetkizilgen. Ehınokokty kıstasy jarylý qaýpinen ana men bala ómiri qyl ústinde turǵan, dep habarlaıdy QazAqparat qoǵamdyq densaýlyq basqarmasynyń baspasóz qyzmetine silteme jasap. .
Dárigerler ýaqyt joǵaltpaı kúrdeli ota jasaýǵa bel býady. Oblystyq klınıkalyq aýrýhana men №1 oblystyq perınataldy ortalyǵynyń bilikti mamandary birlesip, birden eki operatsııa jasaǵan.
Otaǵa jetekshilik etken - oblystyq klınıkalyq aýrýhananyń dáriger-hırýrgy Jeńis Serǵazın. Bilikti mamandar áıeldi kesar tiligimen bosandyryp bolǵan soń sol jaq baýyryn qaptaǵan qurttan laparotomııa ádisi arqyly tazalaǵan.
Tóngen qaýipke qaramastan ana men bala din aman. Salmaǵy 3 keliden astam qyz bala dúnıege keldi. Sábı qazir perzenthanada dárigerlerdiń baqylaýynda. Anasy oblystyq klınıkalyq aýrýhanada em qabyldaýda.
Ekeýiniń de jaǵdaıy birqalypty. Naýqas áıel on kún emdelip bolǵan soń perzentimen qaýyshady.
Jalpy, bul - aýrýhanada baýyr qurtyna jasalyp otyrǵan bıylǵy ekinshi ota.
