Túrkistanda «Craftsman-2019» halyqaralyq qolónershiler jármeńkesi ótýde

TÚRKІSTAN. QazAqparat – Túrkistanda respýblıka deńgeıinde alǵash ret halyqaralyq qolónershiler jármeńkesi ótýde. Qala kúnine oraı uıymdastyrylǵan sharaǵa elimizdiń óńirlerimen birge Iran, Úndistan, Reseı Federatsııasy, Aýǵanstan, Ózbekstan, Túrkııa, Qyrǵyz Respýblıkasy, Ázerbaıjan, Tájikstan, Bashqurtstan, ıAkýtııa elderinen 200-ge jýyq qolónershi qatysýda, dep habarlaıdy QazAqparat tilshisi.

Aýqymdy sharaǵa sonymen birge QR «Qolónershiler birlestigi», Nur-Sultan qalasynyń «Qadam óner ortalyǵy», «Deshti Art» birlestiginiń, «Ázerbaıjan Respýblıkasynyń Prezıdenti janyndaǵy Azamattarǵa qyzmet kórsetý jáne áleýmettik ınnovatsııa memlekettik agenttigi janyndaǵy ABAD» qoǵamdyq quqyqtyq zańdy tulǵasy men Qyrǵyzstan Respýblıkasynyń «Alash» qolónershiler birlestigi de arnaıy shaqyrylǵan. Uıymdastyrýshylardyń aıtýynsha, halyqaralyq jármeńke ulttyq qolónerdi damytý arqyly Uly Jibek jolynyń boıyndaǵy Túrkistan qalasyn álemdik deńgeıdegi iri ulttyq qolóner ortalyǵyna aınaldyrý men etnıkalyq týrızmdi damytý maqsatynda ótýde. Іs-shara aıasynda alasha toqýdan, keramıka, teri, temir jáne shynydan qolóner buıymdaryn jasaý boıynsha sheberlik sabaqtary ótip, qazaqtyń ulttyq kıimderiniń kórsetilimi usynylady dep kútilýde.

Aıta keteıik, Elbasy Nursultan Nazarbaev «Uly dalanyń jeti qyry» atty baǵdarlamalyq maqalasynda qazaq halqynyń álemdik órkenıetke qosqan úlesteri týraly aıtqan bolatyn. Al, ulttyq mádenıetti, dástúrdi jáne bolmysty saqtaýda qolónerdiń de mańyzy zor sanalady. Bul baǵytta Túrkistan oblysynyń ákimi Ómirzaq Shókeev Túrkistan qalasynyń tarıhı jáne ıdeologııalyq negizdemesin qalyptastyrý boıynsha 4 baǵytty usynǵan bolatyn. Sol baǵyttardyń biri – «Túrkistan – álemdik deńgeıdegi sheberler ortalyǵy» dep atalady.

Osy josparǵa sáıkes, Túrkistanda álemdik deńgeıdegi qolóner ortalyǵyn jáne ulttyq qolóner buıymdaryn satatyn saýda ornyn ashý kózdelgen. Al, Túrkistan tórindegi bul jármeńke joǵaryda atalǵan mindetti oryndaý maqsatynda ótip otyr. Altyn adamdarymen, tańǵajaıyp zergerlik buıymdarymen, at ábzelderimen, metall qarý-jaraqtarymen, uly kúmbezderimen tanylǵan qazaq halqynyń álemdik órkenıette alar orny erekshe. Jármeńke arqyly osy uly qasıetterdi jas urpaq boıyna sińirý de nazarǵa alynǵan.