Túrkistanda COVID-19 ınfektsııasyn erte anyqtaıtyn vırýsologııalyq zerthana ashyldy
TÚRKІSTAN. QazAqparat – Túrkistanda «Oblystyq ftızıopýlmonologııa ortalyǵynda» ashylǵan COVID-19 ınfektsııasyn erte anyqtaıtyn vırýsologııalyq zerthana zamanaýı úlgidegi apparattarmen jabdyqtalǵan, dep habarlaıdy QazAqparat tilshisi.
Oblystyq qoǵamdyq densaýlyq basqarmasynyń málimetinshe, Germanııada shyǵarylǵan Xpert, BAK-TEK, BIONER, Haın-test apparattarynyń múmkindikterin paıdalana otyryp koronavırýs indetin anyqtaýǵa bolady. Zerthanaǵa óńirdegi aýrýhanalardan alynǵan synamalar joldanady. Sonymen qatar aýrýhanaǵa túsken naýqastar da birden koronavırýs ınfektsııasyna tekserýden ótkizilýde. Mamandar jańa apparattardy jaqsy meńgerip, halyqqa kórsetiletin medıtsınalyq qyzmet sapasyn arttyrýǵa óz úlesterin qosýda. Jalpy týberkýlez aýrýyna shaldyqqan naýqastar emdeletin bul aýrýhanada aldaǵy ýaqytta sondaı-aq, 16 tósek orynǵa arnalǵan pýlmonologııalyq bólimshe ashý josparlanýda.
Aıta keterligi, emdeý memesinde «Dezınfektsııalaý ótkeli» ornatylǵan jáne kúndelikti naýqastar men barlyq qyzmetkerlerdiń dene qyzýy tekserilip otyrady. Dárigerler tipti onlaın rejımde de dıagnostıkalyq keńes berýdi qolǵa alǵan.
Eske salaıyq, bul óńirde ashylǵan úshinshi vırýsologııalyq zerthana bolyp otyr. Onda qaýipti indet vırýsyn anyqtaýǵa qajetti medıtsınalyq maqsattaǵy buıymdar men qyzmetkerlerdiń jeke qorǵanysh kıimderi jáne zalalsyzdandyrý maqsatynda qoldanylatyn antıseptıktermen tolyq qamtamasyz etilgen.
