Túrkistanda tsıfrlyq Ulys jýrnalynyń tanystyrylymy ótti
TÚRKІSTAN. QazAqparat - Búgin Túrkistan qalasyndaǵy TÚRKISTAN MEDIA halyqaralyq ortalyǵynda ornalasqan Óńirlik kommýnıkatsııalar qyzmetinde tsıfrlyq Ulys jýrnalynyń tanystyrylymy ótti, dep habarlaıdy Qazaqparat tilshisi.
Atalǵan jıynǵa Qazaqstandaǵy alǵashqy elektrondy Ulys jýrnalynyń bas redaktory Erjan Qalymbaı, fılosofııa ǵylymdarynyń kandıdaty Janat Momynqulov, basylymnyń tehnıkalyq dırektory Bolat Ásker, sondaı-aq oblystyq ishki saıasat, mádenıet salasynyń mamandary men baspasóz ókilderi, stýdentter qatysty. Sharada Ulys tsıfrlyq jýrnalynyń bas redaktory, belgili jýrnalıst Erjan Qalymbaı bul jýrnaldyń qazaq medıa tarıhynda úlken jańalyq ekenin aıtyp, jýrnaldyń mańyzdylyǵy men artyqshylyǵy jaıly sóz qozǵady.
«Bul joba - Qazaqstannyń aqparattyq naryǵyn sapaly kontentpen qamtamasyz etýge úles qosady. Mundaǵy saraptamalyq, tanymdyq maqalalar san salany qamtıdy. Geostrategııa, eldiń ishki-syrtqy saıasaty, ekonomıka, jahanda bolyp jatqan ózgerister men trend taqyryptar ulttyq múdde turǵysynan tereń taldanyp qazaq oqyrmandaryna jetkiziledi. Ásirese, Ortalyq Azııa men Túrki álemine erekshe kóńil bólemiz. Jýrnal tek qazaq tilinde shyǵady. «Ulys» sóziniń «ózi uly» is degen maǵynada. Ulttyq uǵymdar sanada jańǵyrsyn degen maqsat. Qazirgi tańda basylymnyń úsh sany shyqty. Aqparattyń sapaly bolýy basty nazarda. Ár sanynda 20 maqala jarııalanady. Olardy zertteý ınstıtýttarynyń mamandary jazady. Aldaǵy ýaqytta elektrondy basylymdy halyqaralyq deńgeıde shyǵarýdy josparlap otyrmyz», - dedi avtor.
Jıynda medıa salasyndaǵy tsıfrlyq tehnologııanyń damýy men búgingi jetistigi jaıly keńinen talqylandy. Sondaı-aq qatysýshylar qazirgi tańdaǵy aqparattyq keńistiktegi jańalyqtar boıynsha kókeıtesti suraqtaryn qoıdy. Joba jetekshileriniń aıtýynsha, jýrnal Digital formatyndaǵy sońǵy úlgidegi tájirıbelerge negizdelip jasalǵan. Máselen, maqalany oqýmen qatar, aýdıo jazbasyn tyńdaýǵa nemese beınejazbasyn kórýge múmkindik bar. Ulys jýrnalyn iOS jáne Android júıelerindegi qosymsha arqyly telefonǵa nemese planshetke tegin júktep alyp, kez kelgen ýaqytta oqı berýge bolady.
