Túrkistanda Call-ortalyq qyzmetkeri sábıdi ólimnen arashalap qaldy
TÚRKІSTAN. QazAqparat – Túrkistan oblysynyń jedel járdem qyzmeti sábıdi ólimnen arashalap qaldy, dep habarlaıdy QazAqparat tilshisi.
Túrkistan oblystyq medıtsınalyq jedel-járdem qyzmetiniń Call-ortalyǵyna Saryaǵash aýdanynan shaqyrtý túsken. Anyqtalǵandaı, 1 jasar sábı dáriniń úsh danasyn jutyp qoıǵan. Dári óńeshine turyp qalyp, tunshyǵa bastaǵan.
Qutqarý toby shaqyrtýǵa shuǵyl attanyp, 6 mınýtta jetken. Biraq olar kelgenshe Call-ortalyq dıspetcheri Qurbanaı Latıpova telefon arqyly balanyń ata-anasyna keńes bere otyryp, tynys joldaryn ashýǵa járdem bergen. Alǵashqy medıtsınalyq kómek der kezinde kórsetilip, náreste ólimnen aman qaldy.
Qazir balanyń tynysy erkin jáne jaǵdaıy jaqsy.
«Sábıdi qutqarýda ata-anasyna keńes berip jatyp, qobaljýǵa jol bermeýge tyrystym. Óıtkeni árbir mınýt sol sátte óte mańyzdy edi. Kómegim sátti aıaqtalǵanda kózimnen jas tamshylap ketti. Jedel-járdem qyzmetiniń Call-ortalyǵynda dıspetcher bolyp jumys istegenime 1,5 jyl boldy. Ár shaqyrtý adam ómirin qutqarýda asa mańyzdy ekenin túsinemin. Qyzmetimiz úlken jaýapkershilikti talap etedi», - deıdi Qurbanaı Latıpova.
Jalpy, Túrkistan oblystyq medıtsınalyq jedel-járdem qyzmetine jyl basynan beri 500 myńǵa jýyq shaqyrtý túsken. Onyń ishinde balalardyń bógde zatqa qaqalý oqıǵalary 169 ret tirkeldi. Dárigerler osy oraıda balalarǵa asa muqııat bolý kerektigin eskertedi.
