Túrkistanda buzaqylar taksı júrgizýshisin uryp-soǵyp, júk salǵyshyna qamap qoıǵan
TÚRKІSTAN. QazAqparat – Túrkistanda taksı júrgizýshisin uryp-soǵyp, tonap ketken kúdiktiler ustaldy. Tergeý barysynda seziktilerdiń kúsh kórsetýden bólek jábirlenýshini kóliktiń júk salǵyshyna qamap qoıǵany anyqtaldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jábirlenýshi jigit polıtsııaǵa habarlasqan. Ol ózin belgisiz adamdar tobynyń uryp soǵyp ketkendigi týraly aıtyp, aryzdanady. Tártip saqshylary taksı júrgizýshisin jaqyn mańdaǵy úılerdiń birine jasyrynyp qalǵan jerinen tapqan. Jábirlenýshi jol boıynda turǵan jigitter ony toqtatyp, aıtqan jerine jetkizip salýyn suraǵan. Taksıst olardy mingizip alyp, mekenjaıǵa jetkende ózin jabylyp, uryp soqqan. Odan soń 80 myń teńgelik uıaly telefony men 17 myńnan astam teńgesin alyp qoıyp, kóliktiń júk salǵyshyna salyp qoıǵan bolyp shyqty. Birshama ýaqyt boıy kólikti júrgizip, mazaq etkeni anyqtaldy. Jábirlenýshi kólik toqtaǵan sátte júk salǵyshtan qashyp shyǵyp, birden polıtsııadan kómek suraǵan. Qazirgi tańda buzaqylardan taıaq jegen jigit emhanada em qabyldap jatyr. Sot-medıtsınalyq saraptamasy taǵaıyndalǵan.
«Atalǵan jaıt QR Qylmystyq kodeksiniń 191-baby «Tonaý» jáne 200-baby «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» boıynsha tirkeýge alynyp, qylmystyq is qozǵaldy. Jedel izdestirý sharalaryna qalalyq polıtsııa basqarmasynan tájirıbeli polıtseıler tartyldy. Kúdikti bolǵan bes adamnyń úsheýi qamaýǵa alyndy. Al qalǵan eki kúdiktige izdeý jarııalandy. Túrkistan qalalyq polıtsııa basqarmasy tergeýshilerimen tergeý amaldary júrgizilýde. Sondaı-aq tergeýshiler bul istiń áli de basqa tustarynyń ashylýy múmkindigin aıtýda», - delingen habarlamada.
