Túrkistanda boıjetkendi zorlamaq bolǵan kúdikti izdestirilýde
TÚRKІSTAN. QazAqparat - Túrkistanda boıjetkendi zorlaýǵa oqtalý boıynsha qylmystyq is qozǵaldy. Bul týraly Oblystyq ІІD baspasóz qyzmetiniń jetekshisi Saltanat Qarakózova málimdedi, dep habarlaıdy QazAqparat.
«Túrkistan qalalyq IIB-nyń kezekshi bólimine qalaǵa oqýǵa kelgen stýdent qyz aryzdanǵan. Ol ózin belgisiz azamat zorlamaq bolǵany týraly habarlaǵan. Atalǵan jaıt QR QK «Zorlaýǵa oqtalý» baby boıynsha tirkeldi. Tergeýshiler sotqa deıingi tergeý jumystaryn bastap ketti. Saraptama taǵaıyndaldy. Polıtseıler kúdiktiniń túr-tulǵasyn anyqtap, ony ustaý sharalary júrgizilip jatyr»,-deıdi Saltanat Qarakózova.
Sondaı-aq, áleýmettik jelide taralǵan aqparattyń birazy jalǵan bolyp shyqty. Máselen, 24 jastaǵy boıjetken Túrkistanǵa zııarat etýge barmaǵan. Ol Túrkistan qalasyndaǵy joǵary oqý oryndarynyń birinde oqıdy.
Eske salaıyq, kúni keshe Túrkistan qalasyndaǵy kesene mańynda jas qyzdy zorlaý oqıǵasy tirkelgen edi. Kúdikti aldymen boıjetkenniń telefonyn tartyp alyp, ońasha jerge súırep aparǵan. Sóıtip aram oıyn iske asyrmaq bolǵan. Kıimin sheship, zorlyq kórsetpek bolǵanda jábirlenýshi qashyp qutylǵan. Ony kórgender tez arada polıtsııa men jedel járdem qyzmetin shaqyrtyp, boıjetkenge medıtsınalyq kómek kórsetti.
