Túrkistanda boıjetken eki ret qatarynan mas bolyp kólik júrgizgen
TÚRKІSTAN. QazAqparat - Túrkistan oblysynda ekinshi ret mas kúıinde kólik júrgizgen júrgizýshi jas qyz ustaldy, dep habarlaıdy QazAqparat.
Túrkistan qalalyq polıtsııa bólimi jergilikti polıtsııasynyń ınspektory, polıtsııa aǵa leıtenanty Saǵı Abseıitov túngi saǵat 00:20 shamasynda qala kóshecinde avtokóliginiń artqy shamyn jaqpaǵan «Mersedes-Bents200» markaly avtokóligin toqtatady.
Tekserý kezinde kólik júrgizýshisiniń áıel ekeni jáne onyń kólikti mas bolyp aıdap kele jatqanyna kúdik týyndaıdy.
Polıtseıler osy jaıtty naqtylaý úshin medıtsınalyq saraptama taǵaıyndady.
Kýálandyrý qorytyndysyna sáıkes kúdikti áıeldiń «orta» dárejede mas ekeni anyqtaldy.
Sonymen qatar júrgizýshiniń qujattaryn qaraý barysynda, onyń budan aldyn ishimdik iship kólik basqarǵany úshin Jańaqorǵan aýdandyq mamandandyrylǵan sotynyń sheshimimen QR ÁQBtK 608-baby boıynsha 5 jyl merzimge kólik quralyn basqarý quqyǵynan aırylǵany anyqtaldy.
Oǵan qaramastan júrgizýshi áıel taǵy da mas kúıinde kólik tizgindegen.
Polıtsııa qyzmetkerleri atalǵan jaıtty QR QK-niń 346-baby boıynsha tirkedi. Qazirgi tańda tergeý amaldary jalǵasyp jatyr.
