Túrkistanda «Bolashaqqa baǵdar - rýhanı jańǵyrý» baǵdarlamasy talqylandy

ShYMKENT. QazAqparat - Túrkistanda qalalyq ishki saıasat bóliminiń uıymdastyrýymen qasıetti Mekkeden oralǵan bir top qajylarmen kezdesý ótti. Basqosýda  «Bolashaqqa baǵdar-rýhanı jańǵyrý» baǵdarlamasyndaǵy basym baǵyttar men din jáne dástúrdiń sabaqtastyǵy sóz boldy, dep habarlaıdy QazAqparat HAA tilshisi.

Jıynda sondaı-aq qajylyq sapardyń qundylyǵy men qasıeti týraly,  ımandylyq pen jastar tárbıesi de qamtylyp ótti. Kópshilik aldynda sóılegen qalalyq ishki saıasat bóliminiń basshysy Baqytjan  Býkebaev qajylyqtan oralǵan jamaǵatqa aldaǵy ýaqytta osy asyl ǵıbadattyń ǵıbratyn jastar arasynda nasıhattap, urpaǵymyzdy ımandylyqqa baýlý jolynda jumyla jumys jasaýǵa shaqyrdy.

Qalalyq ardagerler keńesiniń tóraǵasy Jarqynbek Qulbaıymbetov Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy ulttyq kod uǵymynyń bir qaınary - adam boıyndaǵy asyl qasıet senim, tanym, ımanı kózqarasta ekendigin alǵa tartty. Ǵasyrlar qoınaýynda jatqan rýhanı qundylyqtarymyzdy urpaq sanasynda ulttyq qasıetin saqtaı otyryp, qaıta jańǵyrtý búgingi kóziqaraqtylardyń árbiriniń keleshek aldyndaǵy boryshy ekendigin salmaqtap aıtty.

Sonymen qatar kezdesýge jınalǵandar ulttyq rýhanı bolmystyń saqtalýyna baǵyt beretin, ulttyq sanaǵa áser etetin kúsh - til týraly toqtala kelip, qazaq álipbıiniń  latyn qarpine kóshirý týraly Elbasy bastamasyn biraýyzdan qoldaıtyndyqtaryn bildirdi. Qazaq tarıhyndaǵy tildiń ótkeni men búginen áńgime qozǵady.