Túrkistanda bıylǵy alǵashqy úshemder dúnıege keldi
TÚRKІSTAN. QazAqparat - Túrkistan oblysynda bıylǵy alǵashqy úshemder dúnıege keldi, dep habarlaıdy QazAqparat tilshisi.
Ákimdik baspasóz qyzmetiniń habarlaýynsha, №1 oblystyq perınataldyq ortalyqtyń dárigerleri nebári bir jarym, eki keli salmaqpen týǵan nárestelerdi 20 kún boıy qadaǵalap, jetildirip baryp búgin perzenthanadan shyǵardy.
Qazyǵurt aýdanynyń Qazyǵurt aýylynan №1 oblystyq perınataldyq ortalyqqa jetkizilgen 29 jastaǵy Jadyra Abdalıevaǵa shuǵyl túrde ota jasalyp, dárigerlerdiń kómegimen bosanǵan. Úsheýi de ul bala. 
«Aıy-kúni tolmaı týǵan sábılerdiń salmaǵy nebári (1700 gramm, boıy - 40 sm, 2000 gramm, boıy - 42 sm, 1700 gramm - boıy 48 sm). Dárigerler aman alyp qalǵan úsh ul bala ókpesi durys damymaı týǵandyqtan úsheýi birdeı jasandy tynys alý apparatyna qosylǵan. Tórt kún boıy jansaqtaý bóliminde jatqan úshemniń beti beri qarap, aldaǵy bir aıdy arnaıy kútim jasaıtyn bólimshede ótkizdi. №1 oblystyq perınataldyq ortalyqtyń dárigerleriniń qatań baqylaýynda bolǵan nárestelerdiń árqaısysy osy ýaqyt ishinde salmaq qosqan», - deıdi ortalyqtyń bas dárigeriniń orynbasary Gúljanar Iderova.
Aıta keteıik, úshem ata-anasynyń tuńǵyshtary. Jadyra Abdalıevanyń jaqyndary sábılerdi Aıan, Saıan, Aman dep ataǵan. Búginde nárestelerdiń ómirine esh qaýip joq. 
