Túrkistanda bıyl jańadan salynǵan 70 nysan paıdalanýǵa beriledi
TÚRKІSTAN. QazAqparat – Túrkistan qalasynda otandyq jáne sheteldik beldi qurylys kompanııalar turǵyndardyń tańdaýyna saı san túrli úlgidegi baspanany turǵyzyp jatyr. Oblys ortalyǵynda jyl sońyna deıin jańadan salynǵan 70 nysan paıdalanýǵa berilmek, dep habarlaıdy QazAqparat tilshisi.
Turǵyn úıdiń kóptep salynýynyń arqasynda 2430 otbasy baspanamen qamtamasyz etilip, 3604 jeke jer ýchaskesine ınfraqurylym júrgiziledi.
Oblys ákimi Ómirzaq Shókeev oblys ortalyǵynda boı kótergen osynaý kópqabatty turǵyn úılerdiń qurylys sapasyn tekserip, aıaqtalý merzimin pysyqtady. Qalanyń sáýlettik kelbetine basa mán beretin óńir basshysy merdigerlermen kezdesip, kópqabatty turǵyn úılerdiń syrtqy qasbetin árleýdi júktedi. Qolǵa alǵan jumysty jaýapkershilikpen atqarýdy mindettedi.
2020 jyly «Nurly jer» memlekettik turǵyn úı baǵdarlamasynyń aıasynda memlekettik bıýdjet esebinen 158 nysannyń qurylysyna 36,6 mlrd teńge bólindi. Onyń ishinde 40 arendalyq úı, 30 ınjenerlik ınfraqurylym nysany men 88 kredıttik turǵyn úıdiń qurylysy júrip jatyr.
Memlekettik bıýdjet esebinen satyp alý quqyǵynsyz arendalyq 40 kópqabatty úı de salynýda. Jyl sońyna deıin 978 páterli 18 úıdi paıdalanýǵa tapsyrý josparlanyp otyr. Sondaı-aq, áleýmettik kredıttik turǵyn úıdi damytý baǵytynda 7 qabatty 24 turǵyn úıdiń qurylysy júrip jatyr. 1452 páter jyl sońyna deıin tapsyrylady dep josparlanǵan.
Al, qundy qaǵazdardy satý esebinen Túrkistan qalasy ákimshilik iskerlik ortalyǵynda jańadan 7, 9 jáne 12 qabatty 64 turǵyn úı salynyp jatyr. 3987 páterli kópqabatty úıdiń qurylysyna 4,25%-ben 14,2 mlrd teńge bólingen.
Oblysta memlekettik «Nurly jer» baǵdarlamasynyń sapaly oryndalýyn da sala basshylary qatań baqylaýǵa alǵan.
