Túrkistanda bıyl shıtti maqtanyń baǵasy 400 teńgege deıin kóteriledi dep kútilýde
Túrkistan oblystyq aýyl sharýashylyǵy basqarmasynyń basshysy T.Ospanovtyń aıtýynsha, bıyl oblysta maqta daqyly 126,3 myń gektarǵa egilgen. Jalpy 345 myń tonna shıtti maqta jınalyp, ótken jylǵy kórsetkishten artady dep josparlanyp otyr. Sondaı-aq, maqta baǵasy bıyl 400 teńge kóleminde bolady dep kútilýde. Salystyrmaly túrde aıtar bolsaq, ótken jyly bir keli maqtanyń baǵasy 320-380 teńge aralyǵynda bolǵan.
Aýyl sharýashylyǵy salasyndaǵy jumystar barysy men ózekti máseleler Túrkistan oblysynyń ákimi Ómirzaq Shókeevtiń tóraǵalyǵymen ótken májiliste talqylandy. Óńir basshysy jıyn-terim kezeńinde jumystardy sapaly atqaryp, sharýalarǵa qoldaý kórsetýdi tapsyrdy.
«Bıyl aýyl sharýashylyǵy salasynda kórsetkish joǵary. Jetistikter jyly bolyp tur. Kóp jumys atqaryldy. Bul – osy saladaǵy azamattardyń, halyqtyń eńbeginiń jemisi. Endi osy jetistikke jetý jolyn úıretý úshin sharýalardy jınap, semınar ótkizý kerek. Kókónis, bıdaıǵa qatysty semınar ótkizip, tájirıbemen bólisken jón. Egistik basyna aparyp, tehnıkalar men tehnologııalardy kórsetý arqyly jurtshylyqty aýyl sharýashylyǵyna qyzyqtyra alamyz», – dedi Ómirzaq Shókeev.