Túrkistanda birneshe sport nysandarynyń qurylysy júrip jatyr
TÚRKІSTAN. QazAqparat – Túrkistan oblysynda óńir basshysy Ómirzaq Shókeevtiń tikeleı basshylyǵymen buqaralyq sport pen joǵary jetistikter sportyn damytý jolynda kóptegen jumystar atqarylýda. Memlekettik mańyzy basym baǵytty kúsheıtý úshin sporttyq ınfraqurylymdy damytý jolynda jańa ǵımarattar boı kótergen, dep habarlaıdy QazAqparat tilshisi.
Sport salasyna únemi kóńil bóletin oblys basshysy Túrkistan qalasyndaǵy jańa sport nysandardyń qurylys alańdaryn aralady. Búginde oblys ortalyǵynda dúnıejúzi boıynsha keń taraǵan sport túri - fýtboldy damytý maqsatynda ÝEFA-nyń halyqaralyq talaptaryna saı 7000 adamǵa laıyqtalǵan stadıonnyń qurylysy júrgizilýde. Sondaı-aq, 2 sport zal men álemdik arenaǵa jaýap beretin tabıǵı fýtbol alańy, ákimshilik bólmeler bar sport kesheni bıyl paıdalanýǵa beriledi dep josparlanyp otyr. Jańa stadıonda oblys quramasynyń oqý-jattyǵý jıyndary jáne oblystyq, respýblıkalyq jáne halyqaralyq jarystar ótetin bolady. Sonymen qatar, basseıni bar sport kesheniniń qurylys jumystary da qarqyndy júrgizilýde. Qurylysy aıaqtalýǵa taıaǵan zamanaýı talaptarǵa saı sport kesheninde ulttyq qurama músheleri men oblystyń jas sportshylary da jattyǵatyn bolady. Jańarǵan Túrkistanda ondaǵan sporttyq ǵımarat el ıgiligine beriledi dep josparlanyp otyr.
