Túrkistanda bir túnde 100-den astam sábı dúnıege keldi
TÚRKІSTAN. QazAqparat - Túrkistan oblysynda búgin 102 sábı týylyp, rekord ornady. Olardyń jartysynan astamy, ıaǵnı 57-si qyz bala.
Bul jóninde oblystyq qoǵamdyq densaýlyq basqarmasynan málim boldy, dep habarlaıdy QazAqparat.
Mamandardyń aıtýynsha, bul buryn - sońdy bolmaǵan jaǵdaı. Óıtkeni táýlik sońyna deıin bala sany taǵy da artpaq.
Túrkistan oblysynyń perzenthanalaryndaǵy áıelder saılaýǵa qatysýda. Olar tańǵy 7-den bastap daýys bere bastady.
Aıta keterligi, saılaý kúni Túrkistan oblysynda dúnıege kelgen sábılerge eń kóp qoıylǵan esimder - Saılaý, Saılaýgúl, Nursultan, Qasym-Jomart eken. Túrkistandyqtar sábıleriniń dúnıege kelgendegi qýanyshyn Májilis pen máslıhattar depýtattaryn saılaýmen baılanystyrýdy uıǵarǵan.
Saılaý Túrkistan oblysynyń barlyq perzenthanalarynda ótti. Saılaýǵa úsh júzden astam júkti jáne bosanǵan áıelder qatysyp, azamattyq mindetine jaýapty ekenin tanytty.
Jalpy, Túrkistan oblysy boıynsha jylyna 100 myńǵa jýyq sábı dúnıege keledi. Bul respýblıka boıynsha eń úlken kórsetkish. Óńirde bir táýlik ishinde shamamen 50-60 náreste týylady.
