Túrkistanda bir shaqyrymǵa sozylatyn «Kerýen-saraı» salynady

NUR-SULTAN. QazAqparat – Túrkistanda uzyndyǵy bir shaqyrymǵa jetetin «Kerýen-saraı» salynady. Bul týraly QR Tuńǵysh Prezıdenti— Elbasy Nursultan Nazarbaev «Qazaqstan» ulttyq arnasyndaǵy «Túrkistan: Kóne men keleshek kópiri» derekti fılminde atty, dep habarlaıdy QazAqparat.

«Qazirdiń ózinde Túrkistanda bes juldyzdy eki qonaqúı (Hilton, Rixos) salyndy. Uzyndyǵy bir shaqyrym bolatyn «Kerýen-saraı» ashylady, onyń ishinde qonaqúıler, saýda-sattyq oryndary, basqa da mádenı nysandar bolady. Sol kezde Túrkistan baıaǵydaı týrızm men halyq keletin ortalyq bolady», - dedi N. Nazarbaev.

Elbasy atap ótken «Kerýen saraı» kópfýnktsııaly týrıstik kesheni túrki álemin ǵana emes, álem nazaryn aýdaratyn jobaǵa aınalmaq. Joba aldaǵy kóktemde paıdalanýǵa berilýi tıis.

Qazaqstan, Eýropa jáne Ortalyq Azııa mádenıetin úshtastyratyn joba kóne shahar úlgisi negizinde salynǵan, jáne onda zamanaýı qonaqúıler, Shyǵys bazary, meıramhanalar jáne jasandy kól paıda bolady.

Aıta keteıik, «Túrkistan: kóne men keleshek kópiri» derekti fılmi N.Nazarbaevtyń «Qazaqstan» respýblıkalyq teleradıokorporatsııasynyń Basqarma tóraıymy, jýrnalıst Lázzat Tanysbaıǵa bergen suhbaty negizinde ázirlendi. Derekti týyndy «Qazaqstan» telernasynan búgin 20:00-de efırge shyqty.

Buǵan deıin N. Nazarbaev «El astanasynyń Túrkistanǵa kóshýi múmkin be?» degen suraqqa jaýap bergen edi.

Sonymen birge, Túrkistannan Tashkente temir jol salynyp, Samarqan, Buqara, Tashkent, Shymkent, Túrkistan qalalarynan úlken sheńber jasalmaq.