Túrkistanda belsendi jastardyń jobalary talqylandy
«Árbir jastyń jeke jetistigi – tutas Otanymyzdyń tabysy» degen Tuńǵysh Prezıdent, Elbasy Nursultan Nazarbaevtyń jastarǵa árdaıym aıryqsha kóńil bóletinin bilesizder. Prezıdent Qasym-Jomart Toqaevtyń tapsyrmasymen Jastar jylyn qorytyndylap, voloterlar jylyn bastap otyrmyz. Aldaǵy ýaqytta bul baǵytta kóptegen jumystar atqarylyp, ilkimdi ister júzege asady», – dedi arnaıy Túrkistan oblysyna kelgen «Jas Otan» jastar qanatynyń tóraǵasy Elnur Beısenbaev.
Munan soń Elnur Sabyrjanuly oblystyq Jastar resýrstyq ortalyǵynyń jumysymen tanysty.
Kópfýnktsıonaldy jańa úlgidegi Jastar ortalyǵy bir mezette 400-ge jýyq jasqa qyzmet kórsete alady. Ortalyqta «Jastarǵa qyzmet kórsetý» ortalyǵy, «Mobıldi top», Turkistan HUB coworking zone, IT PARK, Robototehnıka mektepteri, Kovorkıng alańy, elektrondy kitaphana, «Jas sarbaz», «Eriktiler mektebi», «Qurylys jasaqtary», «Tilder mektebi», túrli jastar uıymdary jáne psıhologııalyq terapııa sekildi kóptegen jastar klýbtary, mektepter men úıirmeler jumys jasaıdy. Sondaı-aq, ǵımarat ishinde «relax zone» demalys aımaǵy, ǵımarattyń syrtqy bóliginde fýtbol, voleıbol, basketbol, tennıs oınaýǵa arnalǵan sporttyq alańshalar ornalasqan.
Ortalyqta «Nur Otan» partııasy tóraǵasynyń birinshi orynbasary B. Báıbek pen «Jas Otan» Jastar qanatynyń tóraǵasy E.Beısenbaev belsendi jastarmen kezdesti.
Jıynda tabıǵat janashyry, ekolog Ǵanı Nazarbek janýarlar álemi men ósimdikterdi qorǵaýda jáne ekologııany taza ustaý baǵyty boıynsha partııa tarapynan qandaı jumystar atqarylatyndyǵyn surady. Al, Túrkistan oblystyq jobalyq keńseniń PR-menedjeri Gúljamıla Sársenbaıqyzy partııa men jýrnalıster arasynda tyǵyz qatynas ornatyp, túrli oı qozǵaıtyn klýb qurylsa degen usynysyn jetkizdi. «Shapaǵat» qaıyrymdylyq qorynyń prezıdenti Erkinbaı Shaltan «Múmkindigi shekteýli azamattarǵa partııa tarapynan kórsetiletin qoldaýlar kúsheıtilse» - dedi.
Erkin pikir almasý formatynda ótken basqosýda qoǵamdaǵy ózekti máselelerdi sheshý joldary talqylandy.
Atap óteıik, kıeli shaharǵa at basyn burmas buryn «Jas Otan» Jastar qanatynyń tóraǵasy Kentaý qalasyndaǵy B.Momyshuly eskertkishine gúl shoqtaryn qoıyp, batyr esimin ıelengen bilim ordasyndaǵy mýzeımen tanysty. Oqýshylarmen kezdesip, bilimdi de, bilikti jastardy qoldaýǵa baǵyttalǵan mańyzdy jobalardy túsindirdi.
Sondaı-aq, mashına jasaý salasynda maqtanyshqa aınalǵan «Kentaý transformator zaýytynda» boldy. Kásiporynda búginde 1200-den astam jumysshy eńbek etedi. Onyń 1000-ǵa jýyǵy «Nur Otan» partııasynyń músheleri. Al, 500-ge jýyq jastardyń basym bóligi «Jas Otan» Jastar qanatynyń músheligine engen.
Budan keıin, Kentaý qalalyq «Jas Otan» Jastar qanaty men «Jastar resýrstyq ortalyǵynda» jáne Túrkistan qalasyndaǵy «Keńes ortalyǵy» konsaltıng ortalyǵynyń jumystarymen tanysqan Elnur Sabyrjanuly Q.A.ıAsaýı atyndaǵy HQTÝ-niń stýdent jastarymen de júzdesti.
