Túrkistanda Bekzat Sattarhanovty eske alýǵa arnalǵan halyqaralyq týrnır bastaldy
TÚRKІSTAN. QazAqparat - Túrkistan qalasynda Sıdneı Olımpıadasynyń chempıony, І dárejeli «Barys» ordeniniń ıegeri Bekzat Sattarhanovty eske alýǵa arnalǵan bokstan halyqaralyq týrnır ótip jatyr. Bul týraly oblys ákimdiginiń baspasóz qyzmetinen málim etti, dep habarlaıdy QazAqparat.
Jastar arasyndaǵy XVIII týrnırdiń ashylý saltanatyna Túrkistan oblysy ákiminiń orynbasary Málik Otarbaev, dańqty bapker Tursynǵalı Edilov jáne ózge de azamattar qatysty.
Bekzattyń ata-anasy Seıilhan aǵa men Syrlykúl apa dara perzent týraly estelik aıtyp, jarysty uıymdastyrýshylarǵa alǵysyn bildirdi. Sonymen birge, Olımpıada chempıondary - Ermahan Ibraımov, Baqtııar Artaev jáne álem chempıony Birjan Jaqypov bastaǵan azamattar jas sportshylarǵa sáttilik tiledi.
Sonymen, Túrkistan tórindegi dodaǵa Qazaqstan, Reseı, Tájikstan, Qyrǵyzstan, Ózbekstan, Ázerbaıjan memleketterinen komandalar keldi. Olar 11 salmaq sanatynda júldelerdi sarapqa salady.
Jarys jeńimpazy atanǵan sportshyǵa «Sport sheberi» ataǵy beriledi.
«Qazirgi tańda Túrkistan oblysynyń boksshylary Qazaqstanda úzdikter qatarynda tur. El birinshiliginde osy óńirdiń jigitteri jalpykomandalyq esepte top jardy. Basty meje - Tokıo Olımpıadasynan júlde alý», - delingen baspasóz habarlamasynda.
