Túrkistanda Bekzat Sattarhanov týraly kórkem fılmniń jabyq kórsetilimi ótti
Kartına Sıdneı Olımpıadasynyń chempıony marqum Bekzat Sattarhanovtyń ómiri men sporttaǵy jetistigine arnalǵan. Tolyq metrli kartına 3 qazannan bastap elimizdiń kınoteatrlarynda kórsetiledi dep josparlanǵan.
Aldyn ala kórsetilim barysynda: «Bekzat Sattarhanov dese, degbirimiz taýsylǵansha aıtýǵa barmyz. Sebebi ult ulylyǵyn ulyqtaǵan, jer jahanǵa 20 jasynda óz eliniń atyn tanytyp ketken batyr Bekzat barlyq ıgi iltıpatqa qashan da laıyq. Jasyndaı jarq etken jas ǵumyrdyń erte úzilgeni qaı qaısymyzdyń da qabyrǵamyzdy qaıystyrdy. Bekzattaı batyrdyń bolmysyn búgingi urpaqtyń jadyna jetkizý, búgingi urpaq sanasyna sińirý – barshamyzdyń paryzymyz. Sondyqtan da, «Habar» agenttigi, Sıdneı Olımpıadasynyń chempıony, marqum belgili boksshy - Bekzat Sattarhanov týraly tuńǵysh avtobıografııalyq «Bekzat» dramasyn taspalaýdy sheshti. Maqsatymyz - erte sóngen juldyzdyń sanaýly ǵumyryndaǵy jigerli jetistikterin, qaıtpas qaısarlyǵyn, uljandylyǵy men namysqoılyǵyn kórsetý arqyly - búgingi jas urpaqty rýhtandyrý, jas sportshylarymyzǵa buqaralyq salaýatty ómir saltyn nasıhattaý bolyp tabylady», - dedi «Habar» agenttigi AQ Basqarma tóraǵasynyń birinshi orynbasary Rınat Kertaev.
Bekzat Sattarhanovtyń ata-anasy sharanyń qurmetti qonaǵy boldy.
«20 jas ǵumyrynda qolynan kelgenshe eline barlyq kúsh-jigerin berip ketti. Bekzatqa qandaı marapat, qandaı kıno shyǵarsa da artyq bolmas. Bekzatty jastardyń aldyna úlgi etip qoısa... onyń ımandylyǵy, úlkendi syılaýy, qazaqylyǵy, birbettiligi, alǵa qoıǵan maqsatyn oryndaıtyn minezi qazirgi qazaq jastaryna kerek» - deıdi Bekzat Sattarhanovtyń ákesi Seıilhan Sattarhanov.
Fılmniń sıýjettik jelisinde Bekzat Sattarhanov ómiriniń úsh kezeńi qamtylady. Balalyq shaǵy, bozbala kezeńi jáne ómiriniń sońǵy sáti. 90 jyldardyń basyndaǵy qıyn-qystaý zamanǵa tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi árbir sátte synalyp otyrady.
Birde ata-anasy Bekzatty kúreske qatyssyn dep bapkerge aparady. Onda Bekzat óziniń sergektigimen kózge túsedi. Degenmen kúreske qatysqan balanyń boıy óspeı qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe mahabbaty ashylady. Kún saıyn erinbeı jattyǵyp, alǵash ret Túrkistanda ótken saıysta jarqyrap kórinedi. Bozbala shaǵynda Germanııada ótken týrnırde top jaryp, bapkerler Olımpıadaǵa daıarlaý jattyǵýlaryna qabyldaıdy. 1999 jyly Tashkentte ótken búkil Azııa birinshiliginde kúmis júldege ıe bolyp, Olımpıada oıyndaryna joldama alady. Solaı 2000 jyly Sıdneıde tartysty oıyndar ótkizip, altyn medalǵa ıe bolady.
Kartınanyń rejısseri - Murat Bıdosov, stsenarııin Serjan Zakeruly jazǵan.
Fılmniń túsirilim jumystary Túrkistan, Almaty jáne Ystambul qalalarynda ótken. Basty róldi jas akter Samat Ázimqulov oınaıdy. Ol 2006-2007 jyldary kıkbokstan jastar arasynda eki ret Qazaqstan chempıony bolǵan. Sonymen qatar týyndydan Ǵalymbek Ospanov, Murat Jarylqasynov, Maıra Maqulbekova, Dýlyǵa Aqmolda, Qýanysh Muqataı, Baqdaýlet Shaımahan jáne basqa akterlerdi kóresizder.
