Túrkistanda Bekzat Sattarhanov atyndaǵy halyqaralyq týrnır bastaldy
Jarystyń ashylý saltanatynda Túrkistan oblysynyń ákimi Ómirzaq Shókeev quttyqtaý sóz sóıledi.
«Boks sporty jastarymyzdy qaısarlyqqa, patrıottyq rýhyn qalyptastyrýǵa, ózara qarsylastaryn qurmetteýge, dostyq qatynasty qalyptastyrýǵa zor septigin tıgizedi. Elimiz Táýelsizdigin alǵaly beri elimizde sporttyń boks túri qarqyndy damýda. Sportshylarymyz halyqaralyq arenalarda kók týymyzdy jelbiretip, Olımpıada oıyndary men Álem jáne Azııa chempıonattarynyń jeńimpazdary jáne júldegerleri atandy. Jarysqa qatysýshy boksshylarǵa sáttilik tileı otyryp, sharshy alańda tek myqtylardyń jeńip shyǵýyna tilektespin», – dedi oblys ákimi Ómirzaq Estaıuly.
Bekzattyń anasy Sarlykúl Sattarhanova batyr uly týraly estelik aıtyp, jarysty uıymdastyrýshylarǵa alǵys bildirdi. Saıysqa arnaıy qatysqan sportshylar Bekzattaı batyr máńgi el esinde saqtalatynyn jáne oǵan degen qurmet árdaıym joǵary bolatynyn aıtty.
Túrkistan tórindegi dodaǵa Qytaı men Ózbekstan elderinen jáne elimizdiń barlyq óńirinen 130-ǵa jýyq sportshy keldi. Olarǵa 11 salmaq dárejesinde júldeder tapsyrylady. Jarys kezinde barlyq karantın talaptary qatań saqtalady. Qatysýshylardyń dene qyzyýy tekserilip, araqashyqtyq saqtalǵan.
Bul jarysqa bokstan 2002-2004 jyldary týǵan jastar saıysqa túsip jatyr. Jarys jeńimpazy atanǵan sportshyǵa «Sport sheberi» ataǵy beriledi.
Sıdneı Olımpıadasynyń jeńimpazy, 1-dárejeli «Barys» ordeniniń ıegeri, Qazaqstan Respýblıkasyna eńbegi sińgen sport sheberi Bekzat Sattarhanovty eske alýǵa arnalǵan jastar arasyndaǵy bokstan XIH halyqaralyq týrnıri
naýryzdyń 20-na deıin jalǵasady. Saıys jeńimpazdary sáýir aıynda Polshada ótetin álem chempıonatyna joldama alady.
Túrkistan oblysynyń boksshylary Qazaqstanda úzdikter qatarynda tur. Óńirde 8 oblystyq, 18 qalalyq jáne 7 aýdandyq sport mektepterinde boks bólimderi jumys isteıdi. Onda 252 jattyqtyrýshy 6 myńnan astam balaǵa oqý-jattyǵý jumystaryn júrgizedi. Bokstan eresekter arasynda halyqaralyq, respýblıkalyq týrnırler jyl saıyn ótedi. Sondaı-aq, el chempıonattary men birinshilikterine Túrkistan oblysynyń irikteý saıystary ótkiziledi.
