Túrkistanda baý-baqshaly saıabaq paıda bolady
TÚRKІSTAN. QazAqparat – Túrkistan qalasynda baý-baqshaǵa bólengen erekshe saıabaq boı kóteredi, dep habarlaıdy QazAqparat.
Jańa joba boıynsha Túrkistan qalasynyń irgesinde ornalasatyn jasyl aýmaqta jemis aǵashtary men júzdegen ósimdik túrleri ósirilip, shaǵyn kólinde aqqý, qazdar júzip júredi. Túrkistandyqtar men kıeli mekenge saıahat jasaıtyn meımandarǵa arnalǵan demalys orny 28 gektar alqapty alyp jatyr. Saıabaq jumysyna baý baptaǵan baǵbandar arnaıy shaqyrylady.
«Túrkistan qalasynda qazany qaınaǵan qurylys alańdarynda barlyq jumystar jospar boıynsha júrip jatyr. Tótenshe jaǵdaı erejeleri qatań saqtalyp, sanıtarlyq talaptar kúsheıtilgen. Jyl sońyna deıin 15 nysannyń qurylysy aıaqtalyp, paıdalanýǵa tapsyrý kózdelgen», - delingen óńir ákimdiginiń baspasóz qyzmeti usynǵan aqparatta.
Sonymen qatar, memlekettik bıýdjet esebinen Túrkistanda oblystyq Qurylys basqarmasynyń tapsyrys berýimen 126 nysan qurylysy júrgizilýde. Atap aıtsaq, jyl sońyna deıin 900 oryndyq mektep, ákimdik basqarmalary men departamentter ǵımaratynyń qurylysy aıaqtalady. «Tuńǵysh Prezıdent saıabaǵy», «Jelilik saıabaq», «Arbat», «Býlvar», «Kongress ortalyǵy», «Nur-Sultan alańy», oqýshylar saraıy, tsıfrlyq keńse, basseıni bar úlken sport kesheni, smart sıtı baılanys jelileri, qalalyq saıabaq, drama teatr, ǵalamat kitaphana sekildi birneshe sáýlet jaýhary el ıgiline beriledi. Demeýshiler tarapynan boı kótergen «Kerýen - Saraı» kesheni, bes juldyzdy úsh qonaqúı jáne eń úlken meshit jyl sońyna deıin esigin aıqara ashady.
«Barlyq qurylys nysandaryn ınjenerlik-kommýnıkatsııalyq ınfraqurylymmen qamtamasyz etý maqsatynda jol, sý, gaz, jylý, káriz, elektr jelileri qurylysy júrgizilýde. Jalpy, Túrkistan oblysynyń qurylys basqarmasy tapsyrys berýshi jáne baǵdarlama ákimshisi bolyp tabylatyn nysandarǵa 4 myńnan astam jumysshy jumyldyrylǵan», - dedi vedomstvodan.
