Túrkistanda bas qosqan din qaıratkerleri jahan jurtyn izgilik jolyna jumyldyrýǵa súbeli úles qosady - Prezıdent
«Baýyrlas Ázirbaıjan, Qyrǵyzstan, Ózbekstan men Túrkııa elderiniń Bas múftılerine jáne qurmetti qonaqtarǵa zor rızashylyǵymdy bildiremin. Ata dinimiz - Islam meıirimdilik, ımandylyq, qanaǵatshyldyq sııaqty asyl qasıetterdi dáripteıdi. Sondaı-aq, beıbitshilikti, turaqtylyq pen bereke-birlikti nyǵaıtýǵa shaqyrady. Osy oraıda, alqaly jıynǵa qatysyp otyrǵan din qaıratkerleri jahan jurtyn izgilik jolyna jumyldyrýǵa súbeli úles qosady dep senemin. Búgingi basqosý túbi bir, tarıhy ortaq elderimizdiń rýhanı-aǵartýshylyq baǵyttaǵy jumystaryna tyń serpin berip, ıgi bastamalarymyzdyń baıandy bolýyna yqpal etetini sózsiz»
delingen Prezıdenttiń quttyqtaý hatynda.
Basqosýda túrki álemindegi kópjaqty qarym-qatynastardyń damýy, túrki memleketteri arasyndaǵy yntymaqtastyqty odan ári tereńdetý jaıy talqylandy.
Jıynda sóz sóılegen oblys ákimi Ómirzaq Shókeev buǵan deıin kıeli shaharda Túrkistan deklaratsııasy qabyldanyp, «Túrkistan – Túrki áleminiń rýhanı astanasy» retinde resmı belgilengenin atap ótti. Túrkistannyń aldaǵy ýaqytta da baýyrlas elderge ortaq rýhanı astana retinde damı beretindigin jetkizdi.
«Búgingi basqosýǵa Túrkitildes elderdiń bas mýftıleri, din salasynda súbeli eńbek etip júrgen ǵulama, ǵalymdary arnaıy qatysyp otyr. Adamzat tarıhynyń durys baǵytta órbýinde Islam dininiń alar orny erekshe. Búgingideı almaǵaıyp kezeńderde dinı alaýyzdyqqa jol bermeı, Islam tarıhynyń zerdelenýine eńbek etip júrgen Sizderge degen qurmetimiz erekshe. Túrkistan – qazaq jurtyna ǵana emes, kúlli Túrki baýyrlas elderdi ortaq maqsatqa jumyldyratyn baǵdar bolýy tıis. Osy maqsatta ótip jatqan búgingi jıyn Túrkistannyń ashylmaǵan tarıhı qupııalary men tereń tarıhyn keńinen tanýǵa, Islam órkenıetiniń jandanýyna múmkindik beredi dep senemin», - dedi aımaq basshysy.
