Túrkistanda «Balýan Sholaq» fılminiń premeralyq kórsetilimi ótti
TÚRKІSTAN. QazAqparat - Túrkistan qalasyndaǵy Q.A.ıAsaýı atyndaǵy halyqaralyq qazaq-túrik ýnıversıtetiniń mádenıet ortalyǵynda «Balýan Sholaq» fılminiń kórsetilimi ótti. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen, dep habarlaıdy QazAqparat oblys ákiminiń baspasóz qyzmetine silteme jasap.
Fılmniń rejısseri - Nurgeldi Sadyǵulov. Tarıhı kınolenta palýan, ánshi ári kompozıtor Balýan Sholaqqa arnalǵan.
Qazaq sal-serileriniń sońǵy tuıaǵy, tarıhta «Balýan Sholaq» degen atpen belgili ózi balýan, ári aqyn ári seri Nurmaǵanbet Baımyrzauly jaıyndaǵy fılmde azamattyń el basyna qıyn-qystaý kún týǵan shaqta jasaǵan erligi baıan etiledi. Stsenarııdegi negizgi oqıǵa orys pereselenderiniń qazaq dalasyna kóshirilgen sátimen, sol ǵasyrdaǵy qazaq qoǵamyndaǵy qıyn kezeńmen órnektelgen. Fılm Balýan Sholaqtyń túrmede jatqan týǵan-týys, baýyrlaryn bosatyp, ádildikke qol jetkizýimen aıaqtalady. Fılmde qazaq qoǵamynyń otarshyldyqqa qarsy kózqarasy, kúresi kórinis tapqan.
Ataqty balýannyń rólin Erkebulan Daıyrov somdaǵan. Sonymen qatar Albına Shardarova, Medǵat Ómirálıev, Aleksandr Bagrıantsev syndy akterlardy kóre alamyz.
«Balýan Sholaq» fılminiń ıdeıa avtory, ári stsenarııin jazǵan - oblysymyzdyń týmasy, memlekettik syılyqtyń ıegeri, jazýshy, dramatýrg Dýlat Isabekov.
Kórsetilim barysynda rejısserlyq top túrkistanyq kórermenmen jáne jastarmen kezdesti. Dýlat Isabekov «Balýan Sholaq» fılmin óziniń kıno salasyndaǵy eń tabysty jobalarynyń biri ekenin aıtty. Al fılm rejısseri Nurgeldi Sadyǵulov bul týyndy qazaq jastarynyń otanshyldyq sezimin oıatatynyna senim bildirdi. Túrkistan oblysy ákiminiń orynbasary Málik Otarbaev fılm rejısseri men stsenarıı avtoryna jáne shyǵarmashylyq topqa alǵysyn aıtyp, oblys ákimi atynan syı-sııapat jasady. Atalǵan fılmdi Qazaqstanmen birge túrki álemine de taratý kerektigin aıtty. Kesh sońynda Túrkistannyń ónersúıer qaýymy Dýlat Isabekovpen estelik sýretke túsip, qoltańbasyn aldy.
