Túrkistanda balasyn baılap tastaǵan ananyń ústinen qylmystyq is qozǵaldy
TÚRKІSTAN. QazAqparat – Túrkistan oblysynyń Polıtsııa departamenti áleýmettik jelide taraǵan kishkentaı bala baılaýly otyrǵan vıdeoǵa qatysty túsinik berdi, dep habarlaıdy QazAqparat tilshisi.
Áleýmettik jelide kishkentaı búldirshin bólmeniń ortasynda baılaýly otyrǵan vıdeo tarap jatyr. Kórinisten áıel adamdardyń urys-kerisin, «balany bulaısha qorlaýǵa bola ma?» degen sózderdi estýge bolady. Vıdeony balany kórýge kelgen ákesi túsirgen.
Belgili bolǵandaı, erli-zaıyptylar ajyrasyp ketken soń, bala anasymen qalǵan. Al, perzentin kórýge kelgen ákesi burynǵy áıeli búldirshinniń aýzyn tumshalap, tipti qımyl-qozǵalysyn shektep tastaǵanyn kóredi.
Oqıǵaǵa baılanysty búgin Túrkistan oblystyq Polıtsııa departamenti resmı aqparat taratty. Tártip saqshylarynyń sózinshe, bul jaǵdaı Saryaǵash aýdanynda bolǵan. Qazir tergeý amaldary júrgizilýde.
«Bul jaıt bıylǵy 8 qańtarda Saryaǵash aýdandyq polıtsııa bóliminde sotqa deıingi tergep-tekserýdiń biryńǵaı tizilimine tirkeldi. Aryzda jergilikti turǵyn azamattyq nekede bolǵan burynǵy áıeli 2017 jyly týǵan ulyna qysym kórsetkenine shaǵymdanǵan. Sondaı-aq, Saryaǵash APB qyzmetkerleri QR QK-niń 140-baby «Kámeletke tolmaǵan adamdy tárbıeleý jónindegi mindetterdi oryndamaý» boıynsha is qozǵady. Tergep-tekserý barysynda oqıǵanyń tolyq mán-jaıy men kináliler anyqtalatyn bolady. Qazirgi tańda sotqa deıingi tergeý amaldary jalǵasýda», - delingen habarlamada.
