Túrkistanda «Bala daýysy» ulttyq baıqaýynyń irikteý kezeńi ótýde
TÚRKІSTAN. QazAqparat - Túrkistan qalasynda «Bala daýysy» ulttyq baıqaýynyń irikteý kezeńi ótip jatyr, dep habarlaıdy QazAqparat «Habar 24» telearnasyna silteme jasap.
Jas ónerpazdardyń juldyzyn jaǵatyn jobaǵa oblystyń ár túkpirinen 100-den asa bala qatysyp jatyr. Qazylar alqasy 8-12 jas aralyǵyndaǵy búldirshinderge ártúrli baǵyttaǵy ánderdi aıtqyzyp, daýysy men vokaldyq qabiletterin synap kórýde.
Іrikteý nátıjesi boıynsha juldyzdy tálimgerler men qazylar jas daryndardyń arasynan Almatyda ótetin sýperfınalǵa qatysatyn kishkentaı ónerpazdy tańdap alatyn bolady. «Bala daýysy» ulttyq baıqaýynyń 4-maýsymynda Túrkistan oblysynyń namysyn qorǵaıtyn ónerpazdy jobanyń mýzykalyq prodıýseri Farıda Nııazova men tanymal ánshi Baljan Bıdash anyqtaıdy.
«Men Túrkistan oblysynan tańdalǵan balamen dýet aıtatyn bolamyn. Fınalǵa akterlik sheberlik, bı, vokaldyq jaǵynan ózimiz daıyndaıtyn bolamyz», - dedi tálimger Baljan Bıdash.
Buǵan deıin 29 naýryz kúni «Bala daýysy» jyl saıynǵy baıqaýynyń kezekti maýsymy bastalǵanyn jazǵan bolatynbyz. Bul - Álııa Nazarbaevanyń «Jandaný álemi» qorynyń biregeı jobasy.
Bıyl baıqaýy jańa formatta ótedi. 29 naýryz ben 22 mamyr aralyǵynda shyǵarmashylyq top 8 jáne 12 jas aralyǵyndaǵy naǵyz talanttardy tańdaıdy. Eń talantty 17 bala ǵana baıqaýdyń Sýper-fınalyna joldama alady. Elimizdiń barlyq oblys ortalyqtary men Shymkent, Almaty, Nur-Sultan qalalarynda búldirshinderdi ádil-qazy quramyna kiretin qazaq estradasynyń áıgili juldyzdary, tanymal prodıýserler men horegraftar kútedi.
Kúzde elimizdiń úzdik 17 daýysy «Juldyzdy arman úıinde», Alataý taýlarynyń baýraıynda ornalasqan «Bóbek» ulttyq ortalyǵynda bas qosady. Onda kásibı mýzykanttar, horeograftar, stılıster balalardy Sýper-fınaldyń televızııalyq túsirilimderine daıyndaıdy.
Aqtyq syn bıylǵy 24-26 qazan aralyǵynda Almaty qalasynyń «Respýblıka saraıynda» ótedi.
