Túrkistanda azyq-túlik baǵasyn negizsiz ósirýge qarsy baqylaý kúsheıdi
Eldegi tótenshe jaǵdaıǵa baılanysty Memleket basshysy Qasym-Jomart Toqaevtyń tapsyrmasymen Túrkistan oblysynda áleýmettik mańyzy bar taýarlar baǵasyna turaqty baqylaý júrgizilip jatyr.
Qazir Túrkistan qalasynda áleýmettik mańyzy bar azyq-túlik taýarlarynyń baǵa ındeksi 0,4% -ǵa tómendedi. Jumyrtqa men sábiz baǵasy arzandaǵan. Qalǵan 15 taýar (nan, qartop, kúrish, qunbaǵys maıy, qaraqumyq, aıran, súzbe, qyryqqabat, sıyr eti, taýyq eti, qumsheker, tuz, sary maı, pııaz, makaron) boıynsha jaǵdaı turaqty.
Túrkistan oblysynyń aýdan, qala ákimdikteriniń qoldaýymen merekelik jáne demalys kúnderi kóshpeli saýda júrgizilýde. Óńirde jasandy azyq-túlik tapshylyǵy baıqalmaıdy, baǵalar baqylaýda.
Áleýmettik mańyzy bar azyq-túlik taýarlarynyń baǵasyn retteý tapsyrmasyna sáıkes «Aınalym shemasy» sheńberinde taýar óndirýshilerge jalpy 640 mln. teńge berildi. Sonymen qosa turaqtandyrý qory esebinde 255,7 mln. teńge qarastyrylǵan. Nátıjesinde «Magnum Cash&Carry» JShS, «Alı Saýda» JShS, «Ǵajaıyp-P» JShS, «Saıram sút» JShS-teri men saýda oryndary taýarlardy naryqtaǵy baǵadan 10-15%-ǵa tómen baǵamen satýda. Budan basqa Túrkistan qalasynda fılıaly bar «Magnum cash&Carry» saýda jelisimen áleýmettik mańyzy bar azyq-túlik taýarlaryna saýda ústemesin 15%-dan 10%-ǵa deıin tómendetý týraly monopolııaǵa qarsy komplaens aktisi qabyldandy.
Áleýmettik mańyzy bar azyq-túlik taýarlary baǵasynyń negizsiz ósýiniń aldyn-alý maqsatynda iri saýda oryndary men dúkender jáne ámbebap bazarlarmen bıylǵy 9 qańtardaǵy jaǵdaı boıynsha oblys kóleminde 1098 memorandým túzilgen.
