Túrkistanda áıelder kásipkerligin damytý ortalyǵy ashyldy
TÚRKІSTAN. QazAqparat – Áıelder kásipkerligin damytý ortalyǵynda startap jobalardy iske qosý, jumys istep turǵan bıznesti odan ári keńeıtý jáne damytý maqsatynda birqatar qyzmetter kórsetiledi, dep habarlaıdy QazAqparat tilshisi.
Saltanatty sharaǵa qatysqan Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Lázzat Ramazanova áıelderge óz múmkindikterin iske asyrýda ortalyq mol múmkindik beretinin jetkizdi.
«Ortalyqtyń maqsaty – kásipker áıelderdi aqparattandyrý ǵana emes, sondaı-aq jobalardy naqty qoldaý jáne súıemeldeý. Munda áıelder bıznesin damytýǵa baǵyttalǵan zertteý, marketıng, oqytý jáne basqa da is-sharalar ótkiziledi. Alǵashqy ortalyq bıznespen belsendi aınalysatyn isker áıelderi kóp Túrkistan oblysynda iske qosyldy. Bul bastama óńirdegi áıelder kásipkerligin odan ári damytýǵa yqpal etetinine senimdimin», – dedi L. Ramazanova.
Túrkistanda ashylǵan ortalyq elimizdiń barlyq óńirlik ortalyǵy men respýblıkalyq mańyzy bar qalalarda ashylatyn 17 ortalyqtyń alǵashqysy bolyp otyr.
Joba yntymaqtastyq qory men Ulttyq ekonomıka mınıstrliginiń, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne «Atameken» Ulttyq kásipkerler palatasynyń áriptestigi aıasynda júzege asýda.
Azııa Damý bankiniń qarajaty esebinen qarjylandyrylyp, Qazaqstandaǵy BUU Damý baǵdarlamasy arqyly iske asady.
Saltanatty sharada oblys ákiminiń orynbasary Arman Jetpisbaev óńirde kásipkerlikpen aınalysýshy áıelder kóbeıgendigin aıtyp ótti.
Azııa Damý Bankiniń Qazaqstandaǵy dırektory Narıman Mannapbekov jańa joba áıelderge óz bıznesin damytýǵa, jańa mamandyqtardy ıgerip, kóshbasshylyq áleýetin júzege asyrýǵa kómektesetinin jetkizdi.
Al, BUUDB-nyń Qazaqstandaǵy turaqty ókiliniń orynbasary Vıtalıı Vremısh áıelder kásipkerligin damytýdy qoldaý jobasyn Qazaqstannyń túkpir-túkpirinde qoldaýǵa ázir ekendigin aıtty.
«Atameken» UKP basqarma tóraǵasynyń orynbasary Oljas Ordabaev Qazaqstanda áıelder bıznesin ashý jáne damytý kezinde kezdesetin kedergilerdi qoǵamdyq jáne qarjylyq uıymdar birlese sheshetinine toqtaldy.
Ulttyq statıstıka bıýrosynyń derekterine súıener bolsaq, Qazaqstanda áıelder basqaratyn kásiporyndardyń úlesi - 42,3%.
Olardyń kópshiligi – shaǵyn jáne orta bıznes nysandary.
Aıta keteıik, bıyl áıelder kásipkerligin damytý ortalyǵy Almaty jáne Mańǵystaý oblystarynda ashylady.
Al, kelesi jyly elimizdiń barlyq óńirinde ashý josparlanyp otyr.
