Túrkistanda ashylatyn jańa zaýyt úsh oblystan sút qabyldaıdy
ASTANA. QazAqparat - Túrkistan qalasynda salynyp jatqan «Golden Camel» JShS sút óńdeý zaýytyna úsh oblystyń sharýalary sút ótkize alady, dep habarlaıdy QazAqparat tilshisi.
Biregeı zaýyt qyzmeti týraly Túrkistan oblysy aýyl sharýashylyǵy basqarma basshysynyń orynbasary Nurjigit Myrzahmetov Astanadaǵy aýyl sharýashylyq jármeńkesinde baıandap berdi.
«Túıe jáne bıe sútin óńdeıtin «Golden camel» zaýyty qazaq-qytaı ınvestorlarynyń qarajatyna turǵyzylǵan. Munda tek Túrkistan ǵana emes, Qyzylorda, Jambyl oblystaryndaǵy túıe sharýashylyǵymen aınalysatyn turǵyndardy kooperatsııaǵa biriktirip, sútterin zaýytqa ótkizý kózdelgen. Bizdiń esebimizshe, Túrkistan oblysynda qazir 29-30 myń túıe bar, Qyzylorda oblysynda - 47 myńǵa jýyq jáne Jambyl oblysynda - 13-15 myń túıe bar», - dedi Nurjigit Myrzahmetov.
Onyń aıtýynsha, zaýyt jyl sońyna deıin iske qosylýy tıis. Onda táýligine 100 tonna túıe jáne jylqy súti qaıta óńdeledi jáne sút untaǵy shet memleketterge eksporttalady.
«Zaýyt kelisimi boıynsha, túıe sútin bazar baǵasynan 50-100 teńgege qymbatyraq qabyldaıdy. Memleket tarapynan berilip jatqan jeńildikter, jeńildetilgen neıseler bar. Sol boıynsha sharýalarǵa túsindirme jumystaryn júrgizemiz», - dep óz sózin tolyqtyrdy N. Myrzahmetov.
Qazirgi ýaqytta Túrkistan oblysynda óndirilgen 1 mln 800 myń tonnaǵa jýyq ónim eksportqa shyǵarylyp jatyr. Oblystyń jemis-jıdegi, qaýyn-qarbyzy men júzimderi Reseı men Germanııaǵa jetken.
«Respýblıkada óndiriletin aýyl sharýashylyǵy jalpy óniminiń 13%-yn Túrkistan oblysy óndiredi. Respýblıka boıynsha maqtanyń 100%, júzimniń - 72,5%, baqshanyń - 60%, jemis-jıdektiń - 36%, kókónistiń - 24%, súttiń - 13,5%, ettiń - 12,3%-y Túrkistan oblysynyń úlesinde», - deıdi N. Myrzahmetov.
Aıta keteıik, Elordadaǵy «Qazaqstan» sport kesheni aýmaǵynda Túrkistan oblysynyń kezekti aýyl sharýashylyǵy jármeńkesi ótip jatyr. Onda ónimderdi bazardaǵy baǵadan 10-15% tómen alýǵa bolady.
