Túrkistanda arnaıy áleýmettik qyzmet kórsetý ortalyǵynda jatqan 61 naýqas týberkýlez juqtyrǵan
ShYMKENT. QazAqparat - Túrkistandaǵy arnaıy áleýmettik qyzmet kórsetý ortalyǵynda em qabyldap jatqan 61 naýqas ókpe qurt dertin juqtyrǵan. Juqpaly aýrýdan úsheýi kóz jumdy. Bul týraly búgin Aımaqtyq kommýnıkatsııalar qyzmetinde ótken brıfıngte málim boldy, - dep habarlaıdy QazAqparat HAA tilshisi.
9-11 qańtar aralyǵynda Túrkistandaǵy arnaıy áleýmettik qyzmet kórsetý ortalyǵyndaǵy naýqastardy kezekti medıtsınalyq tekserýden ótkizgen dárigerler 7 naýqastyń ókpe qurt aýrýyna shaldyqqanyn anyqtaǵan. Osydan keıin ortalyqtaǵy 502 naýqas qaıta tekserýden ótipti. Nátıjesinde 61 adamnyń ókpe qurt aýyryn juqtyrǵany belgili boldy. Onyń jartysyna jýyǵynda aýrýdyń ashyq túri bolyp shyqqan. Der kezinde em qabyldamaǵan úsh adam dertinen aıyqpaı, qaıtys bolypty.
«Týberkýlezdi juqtyrǵan naýqastar qazir basqa mekemelerge aýystyrylyp, tıisti em qabyldaýda. Olardy baqylaý kúsheıtilgen. Barlyq epıdemıologııalyq emder taǵaıyndaldy. Osy máselege oraı búgin QR Densaýlyq saqtaý mınıstriniń buıryǵymen Vedomstvoaralyq komıssııa qurylyp, onyń qataryna Eńbek jáne áleýmettik qorǵaý mınıstrliginiń, Densaýlyq saqtaý mınıstrligi men Ońtústik Qazaqstan oblysy ákimshiliginiń ókilderi kirgen. Komıssııa tıisti emdeý sharalaryn, áleýmettik qyzmet paketin, emdeýdiń sapasy men ınfektsııalyq baqylaý talaptarynyń qanshalyqty saqtalǵanyn baqylaıtyn bolady», - dedi QR Densaýlyq saqtaý vıtse-mınıstri Alekseı Tsoı.
Búginde respýblıkadan arnaıy mamandar shaqyrtylyp, naýqastardy emdeý sharalary júrgizilýde.
«Aldyn ala júrgizilgen tekserý qorytyndysy boıynsha patsıentterdiń flıýorografııalyq tekserýmen tolyq qamtylmaǵany, týberkýlezdi anyqtaý jáne emdeý algorıtmderi, dezınfektsııalaý tártibi saqtalmaǵany, t.b. kemshilikter anyqtalǵan. Qazirgi kezde dıspanserdegi 363 qyzmet alýshy qatań baqylaýǵa alyndy. Olar boıynsha da tereńdetip zertteý jumystary júrgizilip jatyr. Bul jóninde oblys ákimi, oblys ákimdigi tarapynan birneshe arnaıy jıyndar ótkizildi»,-dedi oblys ákiminiń orynbasary Erbol Sadyr.
Spıkerlerdiń sózinshe, kemshilikterge jol bergen qyzmetkerlerge qatysty qyzmettik tekserý taǵaıyndalyp, tekserý qorytyndysymen tıisti sharalar qabyldanatyn bolady.
Eske sala keteıik, ótken jyldyń qyrkúıek aıynda atalmysh dıspanserde jatqan bir naýqastyń ata-anasy emdeý mekemesinde sanıtarlyq talaptar múlde saqtalmaıtyndyǵyn, em qabyldaýshylardyń jaǵdaıy óte nashar ekenin kórsetetin beınetúsirilim jasaǵan bolatyn. Sodan keıin elimizdiń Densaýlyq saqtaý mınıstrligi tarapynan arnaıy komıssııa qurylyp, dıspanserdiń bas dárigeri qyzmetinen ketken edi.
