Túrkistanda ardager analar ardaqtaldy
TÚRKІSTAN. QazAqparat – Túrkistan qalasynyń ákimi Rashıd Aıýbekov kıeli shahardyń qalyptasýy jolynda aıanbaı eńbek etip, damýyna kúsh-qaıraty men tájirıbesin jumsaǵan ardaqty jandarǵa qurmet kórsetti, dep habarlaıdy QazAqparat tilshisi.
Sondaı jandardyń biri temir jol salasynyń ardageri Hamdııa Shakırova. Ol Tatarstan Recpýblıkasynyń týmasy bolǵanymen Túrkistanda ósip, eńbek jolyn da toǵyz joldyń torabyndaǵy Túrkistan temirjol ashanasynda qyzmetshi bolyp bastaǵan.
Keıin taýar boıynsha sarapshy, 20 jylǵa jýyq ıaǵnı qurmetti zeınetkerlikke shyqqanǵa deıin basshylyq qyzmetter atqarǵan. Eki ret qalalyq keńestiń depýtaty, qalalyq partııa komıtetiniń múshesi bolǵan zeınetkerge búginde «Túrkistan qalasynyń Qurmetti azamaty» ataǵy berilgen. Al, Marııa Danshınanyń da eńbek joly qasıetti qalamen tikeleı baılanysty.
14 jasynan eńbekke aralasqan Marııa Fedorovna aldymen kolhozda jumysshy bolyp bastap, keıinnen qaladaǵy №15 mektep-ınternatynda aspazshy bolyp adal eńbek etken. Eren eńbegin de tolyǵymen osy salada atqaryp, 1987 jyly qurmetti zeınetkerlikke shyqqan qart ana búginde eńbeginiń zeınetin kórýde.
Qala basshysy Rashıd Aıýbekov pen qalalyq UOS jáne eńbek ardagerleri keńesiniń tóraǵasy Jarqynbek Qulbaıymbetuly qos zeınetkerdiń otbasynda bolyp, eldiń damýy jolynda etken eńbekteri úshin rızashylyqtaryn jetkizdi. Qos anany «Qarttar kúni» merekesimen quttyqtap, shoq qyzyl gúlderi men arnaıy syı-sııapatyn tabys etti. Óz kezeginde qýanyshtaryn jasyra almaǵan Hamdııa Korneevna men Marııa Fedorovna qala basshysyna alǵystaryn jaýdyryp, Túrkistannyń ósip-órkendeýi jolyndaǵy eńbekterinde zor tabystar tiledi.
