Túrkistanda aptap ystyq: eń joǵary temperatýra Qyzylqumda tirkeldi
«Qazgıdromet» RMK Túrkistan oblysy boıynsha fılıalynyń málimetinshe, óńirde eń joǵary aýa temperatýrasy Qyzylqum aımaǵynda tirkelgen.
«Saǵat 15:00-degi jaǵdaı boıynsha Qyzylqumda 44,2 gradýs boldy. Al, Túrkistan qalasynda – 42,7, Shymkentte – 40 gradýs ystyq tirkeldi. Búgingi kúnniń eń sońǵy málimetteri saǵat 21:00-de belgili bolady», - delingen sınoptıkterdiń aqparatynda.
Al, oblys turǵyndary áleýmettik jelide aptap ystyqqa baılanysty túrli vıdeolar taratyp jatyr. Biri jumyrtqany kúnge pisirip eksperıment jasasa, endi biri kóligindegi ólshegishtiń kórsetkishin júktedi. Al, velosıpedpen jeldetkish alyp ketip bara jatqan turǵynnyń áreketi kópshilikke kóterińki kóńil kúı syılady. Ol quddy bir velosıpedine úlken jeldetkish qosyp alǵandaı kóringen. Jeli qoldanýshylarynyń jazýynsha, oqıǵa Túrkistan qalasynda túsirilipti.
Aıta keteıik, keshe Túrkistan oblysynda kún raıy 45 gradýsqa deıin kóteriletinin jazǵan bolatynbyz.
«Qazgıdromet» RMK Túrkistan oblysy boıynsha fılıalynyń málimetinshe, aptap ystyqtyń ekpini erteńnen bastap túse bastaıdy.
