Túrkistanda ana men bala ólimin azaıtý máseleleri talqylandy
TÚRKІSTAN.QazAqparat – Túrkistan qalasynda «Ana men bala» atty aımaqtyq ǵylymı-bilim forýmy ótti.
Keleli basqosýda Qazaqstannyń barlyq aımaǵynan jınalǵan akýsher-gınekologtar reprodýktıvti densaýlyqty nyǵaıtýǵa baǵyttalǵan ǵylymı jetistikterimen bólisti, dep habarlaıdy QazAqparat tilshisi.
Qazaqstan Respýblıkasy Densaýlyq saqtaý mınıstrligi men «Akýsherııa, gınekologııa jáne perınatologııa ǵylymı ortalyǵy» AQ uıymdastyrǵan jıynǵa neonatologtar men medıtsınalyq genetıkter, anestezıolog-reanımatologtar men zertteýdiń fýnktsıonaldyq ádisteriniń mamandary (ÝDZ, KTG), elimizdiń akýsherleri men medbıkeleri qatysty.
Forýmda dárigerler ana men bala ólimin azaıtý máselelerin talqylap, ózara tájirıbe almasty. Sebebi, dúnıe esigin jańa ashqan sábılerdiń ómir bastaýynda dál osy dárigerlerdiń qyzmeti asa mańyzdy. Forýmǵa qatysqan Ulttyq akýsher-gınekolog dárigerleri qaýymdastyǵynyń tóraıymy, professor Nına Kaıýpova nárestelerdiń ómirge kelý kórsetkishi boıynsha Túrkistan oblysy kósh bastap turǵanyn aıtady.
Demografııalyq ahýaldy kóterýde Almaty, Atyraý, Jambyl, Mańǵystaý oblysy men Astana qalasy da aldyńǵy qatarda keledi.
Mamandardyń málimetinshe, ana men bala ólimi kórsetkishi ótken jyldarmen salystyrǵanda áldeqaıda tómendegen. Ólim-jitimniń aldyn alý maqsatynda úzdiksiz saraptamalar júrgizilip, júktilik pen bosanýdyń qaýipsiz tehnologııalary jetildirilýde.
Forýmda aıtylǵan málimetke súıensek, respýblıka kóleminde bes myńǵa jýyq akýsher-gınekolog bar. Degenmen elimizde kadr jetispeýshiligi baıqalady. Óz kezeginde, Túrkistan oblystyq Qoǵamdyq densaýlyq basqarmasynyń basshysy Muqan Egizbaev memleket tarapynan medıtsına salasyn damytýǵa úlken nazar bólinip jatqandyǵyn atap ótti. Oblysta jańa nysandar salynyp, halyqtyń densaýlyǵyn jaqsartý turǵysynda aýqymdy jumystar júrgizilýde.
