Túrkistanda ana men bala dárigerlerin daıarlaıtyn ortalyq ashyldy

TÚRKІSTAN. QazAqparat - Búgin Túrkistan oblysynda tuńǵysh ret oblystyq densaýlyq saqtaý basqarmasynyń jáne BUU-nyń Balalar qorynyń (ıÝNISEF) uıymdastyrýymen medıtsınalyq qyzmetkerlerdiń biliktiligin arttyrýǵa baǵyttalǵan oqý ortalyǵy ashyldy, dep habarlaıdy QazAqparat tilshisi.

Saltanatty rásimge ıÝNISEF-tiń Qazaqstandaǵy ókili ıÝrıı Oksamıtnyı, Túrkistan oblysy Densaýlyq saqtaý basqarmasynyń basshysy Muqan Egizbaev jáne oblystyń medıtsınalyq qoǵamdastyq ókilderi qatysty.

Atalǵan ortalyq aldaǵy ýaqytta aıaǵy aýyr áıelder men kishkentaı balalary bar otbasylar úshin ámbebap-ozyq úlgidegi keshendi qyzmet kórsete alatyn patronajdy medbıkelerdi daıyndaıtyn bolady. Ortalyq jyl saıyn myńdaǵan patronajdy medbıkelerge, dárigerlerge, áleýmettik qyzmetkerlerge, sondaı-aq, psıhologtarǵa balalardyń tolyqqandy damýy jaıly jáne ata-analardy aqparattandyrýǵa qajetti bilimmen qamtamasyz etpek.

Aıta keterligi, ortalyq kishkentaı balalardyń tolyq damýy salasyndaǵy ıÝNISEF pen DDSU-nyń halyqaralyq standarttaryna sáıkes keletin ozyq bilimi bar dárigerlerdi, patronajdy medbıkeler men áleýmettik qyzmetkerlerdi oqytyp shyǵarýǵa qajetti quraldarmen tolyqtaı jabdyqtalǵan.