Túrkistanda amfıteatr paıdalanýǵa beriledi
NUR-SULTAN. QazAqparat - Túrkistan turǵyndarynyń ıgiligine birshama ýaqyttan soń amfıteatr ǵımaraty qyzmet kórsetetin bolady. Bıylǵy jyldyń sáýir aıynda qurylys jumystary bastalǵan ǵımarat qazan aıynda aıaqtalady dep josparlanyp otyr, dep habarlaıdy oblystyq ákimdiktiń baspasóz qyzmeti.
1000 orynǵa laıyqtalǵan zamanaýı keshenniń jalpy kólemi 2400 sharshy metrge teń. «Rýhanı-mádenı ortalyq» aımaǵyndaǵy 0,56 gektar jerge júrgizilip jatqan qurylys alańynda kúndiz - 22, túngi aýsymda 10 jumysshy eńbek etýde.
Qurylysqa jaýapty «AA-Stroıınjınırıng» JShS merdiger kompanııasynyń ýchaske bastyǵy Abaı Abdýrahmanov jumys óz qarqynymen júrgizilip jatqanyn aıtyp, aldaǵy ýaqytta nysan kelisilgen merzimde aıaqtalatynyn jetkizdi.
Elbasy - Tuńǵysh Prezıdent N.Nazarbaevtyń bastamasymen Túrkistan qalasynyń oblys ortalyǵy ataný qurmetine oraı respýblıkamyzdaǵy ózge oblys ákimdikteri jańa oblys ortalyǵyna bir-bir ǵımarattan salyp, syıǵa tartatyn bolǵan. Sonyń biri - amfıteatr Mańǵystaý oblysy ákimdiginiń syıy. 
