Túrkistanda «Altyn dombyra» respýblıkalyq aıtysy bastaldy
«Kıeli Túrkistan topyraǵynda alaman aıtystyń shymyldyǵyn ashyp otyrmyz. «AMANAT» partııasy rýhanııat pen mádenıetke jan-jaqty qamqorlyq jasap keledi. Sonyń bir aıǵaǵy – ultymyzdyń boıtumaryna aınalǵan osy aıtys. El Prezıdenti Qasym-Jomart Toqaevtyń bastamasymen elimiz jańa dáýirge, ádiletti Qazaqstanǵa qadam basty. Qoǵam ózgerip jatyr. Osy oń ózgeristerdi bolashaqqa aqyndarymyz jetkizedi dep oılaımyn», - dedi Parlament Májilisiniń tóraǵasy Erlan Qoshanov aıtystyń ashylý saltanatynda.
Mádenıet jáne sport mınıstrligi uıymdastyrǵan aıtysta elimizdiń eń úzdik 18 aqyny bas qosty.
«Altyn dombyranyń» túrki jurtynyń rýhanı tórinde ótýi – biz úshin zor mártebe ári zańdylyq. Ózderińizge belgili, osydan 4 jyldan astam ýaqyt buryn óziniń tarıhı tuǵyryna qaıta qonǵan Túrkistan qalasy jańarý men jańǵyrýdyń buryn-sońdy bolmaǵan jańa belesine kóterildi. Biz árqashan da mádenı-rýhanı is-sharalardy qabyldaýǵa daıynbyz, - dedi Túrkistan oblysynyń ákimi Darhan Satybaldy.
Bıylǵy jyldyń basty dodasyna elimizdiń ár óńirinde jyl boıy ótken aıtystarda jeńimpaz atanǵan tanymal aqyndar jınalǵan. Aıtysty Qazaqstannyń eńbek sińirgen qaıratkeri, Parlament Májilisiniń depýtaty Amanjol Áltaev júrgizip otyr.
Aıta keteıik, respýblıkalyq «Altyn dombyra» aqyndar aıtysy 2012 jyldan bastap uıymdastyrylyp keledi. Byltyr bul dodada túrkistandyq Bekarys Shoıbekov jeńimpaz atanǵan bolatyn. Túrkistan tórindegi aıtys 2 kúnge jalǵasady.
