Túrkistanda alǵash ret sambodan jarys ótip jatyr
TÚRKІSTAN. QazAqparat - Túrkistanda alǵash ret sambo kúresinen jastar men eresekter arasynda jarys ótip jatyr. Saıysqa óńirdegi barlyq qala-aýdandardan 240 balýan qatysty, dep habarlaıdy QazAqparat tilshisi.
Bekzat Sattarhanov atyndaǵy sport kesheninde ótken shara el chempıonatyna úzdikterdi irikteý maqsatynda uıymdastyryldy. Sondaı-aq, aqpan aıynda Aqtaý qalasynda ótetin jastar arasynda QR chempıonaty jáne Semeıde eresekter arasynda el chempıonatyna úzdikterdi irikteý boldy. Sportshylar 10 salmaq dárejesi boıynsha synǵa tústi.
«Men tek sambomen emes, dzıýdo, qazaqsha kúres basqa da kúres túrlerimen aınalysamyn. Osy jarysta jeńip, el chemıonatyna shyqsaq degen nıetim bar. Qazir 56 kelide kúresemin. Qarsylastarymnyń barlyǵy osal emes ekenin baıqadym. Barlyǵynyń daıyndalyp kelgeni baıqalady. Degenmen alǵashqy kezdesýimde Keles aýdanynan kelgen sportshymen beldesip, 8:0 esebimen aıqyn basymdyqpen jeńiske jettim»,-deıdi Shardaradan kelgen balýan Beksultan Syrbek.
Jarystyń qortyndysy búgin, 23 qańtarda belgili bolmaq. Onyń jeńimpazdary el chempıonatyna joldama alady.
