Túrkistanda alǵash ret oblystyq máslıhattyń sessııasy ótti
Túrkistan oblysynyń ortalyǵynda alǵash ret ótip jatqan altynshy shaqyrylymdaǵy oblystyq máslıhattyń kezekten tys jıyrma altynshy sessııasyn máslıhat sessııasynyń tóraǵasy Bazarbaı Musabekov júrgizdi.
Sessııa jumysyna oblys ákimi, oblys ákimdiginiń músheleri, oblystyq aýmaqtyq saılaý komıssııasynyń tóraǵasy, qala jáne aýdan ákimderi, quqyq qorǵaý organdarynyń, oblystyq aýmaqtyq departamentter men basqarmalardyń, uıymdardyń basshylary, buqaralyq aqparat quraldarynyń ókilderi qatysty.
Oblystyq máslıhat sessııasynyń kúntártibinde oblysty basqarý shemasyna ózgerister engizý men Túrkistan oblysy ákimdiginiń derbes quramyn kelisý týraly jáne óńirdiń ákimshilik-aýmaqtyq qurylysy syndy alty másele qaraldy.
Sessııa otyrysynda sóz alǵan oblys ákimi Janseıit Túımebaev búgingi Túrkistan qalasynda ótkizilip otyrǵan oblystyq máslıhatynyń sessııasy tarıhı ekenin aıtyp, Elordada 1997 jyly 9 jeltoqsanda ótkizilgen QR Parlamentiniń birlesken birinshi májilisin eske aldy.
«Túrkistan oblysy - el ıgiligi, ult bolashaǵy úshin qabyldanǵan Elbasymyzdyń bastaýymen qolǵa alynǵan mańyzdy sheshim. Bul Astananyń 20 jyldyǵyn toılaý kezinde Qazaqstanǵa jańa serpin beretin, jańa bastama bolatyn úlken qozǵalys bolyp tur. Elbasymyz 19 maýsymda osy Jarlyqqa qol qoıý kezinde kóp nárseni túsindirip aıtty. Orta ǵasyrlarda Qazaq handyǵynyń ordasy bolǵan, qazaq jerinde memlekettiliktiń qalyptasýyna erekshe yqpal etken, talaı handarymyz, bılerimiz ben batyrlarymyz jáne sultandarymyz jatqan Túrkistan qalasy shynynda da ózine laıyqty Qazaqstannyń jáne túrki dúnıesiniń mádenı ortalyǵy bolýǵa tıisti», - dedi oblys ákimi.
Budan bólek, sessııa barysynda oblys ákimi depýtattardy «Astananyń 20 jyldyǵy» medalimen jáne máslıhattyń Qurmet gramotasymen marapattady.
