Túrkistanda áleýmettik mańyzy bar azyq-túlik baǵasy turaqty
TÚRKІSTAN. QazAqparat - Túrkistan qalasynda áleýmettik mańyzy bar azyq-túlik taýarlarynyń baǵasy turaqty, dep habarlaıdy QazAqparat.
Óńirlik kommýnıkatsııalar qyzmetinen málim etkendeı, halyq kúndelikti tutynatyn taýarlardyń baǵasyn turaqtandyrý maqsatynda oblystyq Kásipkerlik jáne saýda basqarmasynyń uıymdastyrýymen birqatar is-sharalar qolǵa alynýda. Atap aıtqanda, mamandar kásipkerlermen áleýmettik mańyzy bar azyq-túlik taýarlarynyń baǵasyn negizsiz kótermeý jóninde jıyndar ótkizip, ortaq kelisimge kelgen. Nátıjesinde turǵyndar azyq-túlikti bazar narqynan 15-20% tómen baǵada satyp alýda.
Túrkistan oblystyq kásipkerlik jáne saýda basqarmasy men «Túrkistan ÁÁK» AQ Turaqtandyrý qorynyń mamandary udaıy saýda oryndaryn aralap, halyq kóp tutynatyn taýarlardyń baǵalaryna baqylaý júrgizedi. Qazirgi tańda Túrkistan qalasyndaǵy 14 áleýmettik dúken men 5 saýda ortalyǵynda halyq kóp tutynatyn 19 túrli taýardyń baǵasy tolyq baqylaýǵa alynǵan. Baǵany turaqty saqtaý úshin oblystyq Turaqtandyrý qory saýda oryndaryna taýarlardy jetkizip otyr.
Azyq-túlikterdiń baǵasyna kelsek, áleýmettik dúkender men «Shapaǵat», «Dastarqan», «Báıterek», «Bereke», «Dáýlet» saýda oryndarynda nan baǵasy - 75 teńgeden satylsa, jumyrtqa - 26-28 teńge, kartoptyń kelisi - 89 teńge, qyryqqabat - 89 teńge, pııaz - 56 teńge, sábiz - 76 teńge, qanttyń kelisi - 205 teńge.
Sonymen qatar, áleýmettik mańyzy bar azyq-túlik taýarlary baǵasyn retteý maqsatynda Túrkistan qalasyndaǵy «Gúlder» alleıasynda aýyl sharýashylyǵy ónimderiniń jármeńkesi aıyna 2 ret ótkizilýde. Aldaǵy ýaqytta jármeńke 7, 21 naýryz jáne 4 sáýirde ótetin bolady.
