Túrkistanda áleýmettik dúkender sany 13-ten 50-ge deıin kóbeıedi
Baǵany turaqtandyrý maqsatynda óńirde azyq-túlik taýarlarynyń baǵasyna únemi monıtorıng júrgizilýde.
Sońǵy aptada Túrkistan qalasy boıynsha áleýmettik mańyzy bar azyq-túlik taýarlarynyń ishinde pııazdyń baǵasy 145 teńge, makaron 308 teńge, kúrish 380 teńge bolǵan. Baǵalardy turaqtandyrý boıynsha birqatar sharalar qabyldanyp jatyr. Deldaldyq tetikterdi anyqtaý jumystary kúsheıtilgen. Monıtorıng jáne taldaý nátıjesinde birqatar saýda oryndarynda saýda ústemesiniń asyp ketý faktisi anyqtalyp, ákimshilik quqyq buzýshylyq týraly hattamalar toltyrylǵan. Sondaı-aq, bıyl Túrkistanda áleýmettik dúkender sany 13-ten 50-ge jetkizilmek.
Búgin Túrkistan oblysy ákimdiginde ótken jıynda oblys ákimi Darhan Satybaldy sala mamandaryna baǵany turaqtandyrý boıynsha naqty nátıje beretin tetikter tabýdy tapsyrdy. Ásirese, alypsatarlarǵa baqylaýdy kúsheıtip, azyq-túlik pen taýar qunyn negizsiz ósirýge jol bermeý qajettigin aıtty. Baǵanyń baqylaýsyz ketpeýin qadaǵalaýdy tapsyrdy.
«Árbir taýardyń baǵasy boıynsha jaǵdaıdy kúndelikti baqylaýda ustap otyrý kerek. Azyq-túlik baǵasyn baqylaý, onyń ósýine jol bermeý jumystary oıdaǵydaı emes. Naqty nátıje az. Jármeńkeler de óz nátıjesin bermeı otyr. 2019-2021 jyldary 14 áleýmettik dúkeni ashylyp, odan keıin mundaı dúken ashý isi toqtap qalǵan. Bıyl ǵana sany artqaly jatyr. Osy salaǵa jaýapty orynbasarym men jaýapty basshylarǵa azyq-túlik baǵasyn negizsiz kóterýdiń aldyn alý, monıtorıng jumysyn kúsheıtýdi tapsyramyn», – dedi Darhan Satybaldy.
Aıta keteıik, óńirde 19 túrli áleýmettik mańyzy bar azyq-túlik taýary boıynsha jalpy 99,3 myń tonna qory bar. Áleýmettik mańyzy bar azyq - túlik taýarlarynyń 15 túri oblysta óndiriledi.
