Túrkistanda álemde sırek kezdesetin, 12 aı boıy gúldep turatyn ósimdikter otyrǵyzylǵan
TÚRKІSTAN. QazAqparat - Túrkistan oblysynyń ákimi Ómirzaq Shókeev óńirdegi qurylysy aıaqtalǵan nysandardyń jumysyn tekserip shyqty, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Boı kótergen ǵımarattardyń ishki árleý jáne abattandyrý jumystary júrip jatyr. Jasyl qalaǵa aınalyp kele jatqan Túrkistannyń tóńireginde kógal men tal egý jumystaryna erekshe nazar aýdarylǵan. Qalanyń jasyl jelegin jaıqaltyp, ekologııalyq jaǵdaıyn jaqsartý maqsatynda eń ozyq tehnologııalar qoldanylýda.
28 gektar alqapty alyp jatqan Túrkistan qalalyq dendrosaıabaǵy qala irgesinde ornalasqan. Munda 12 myń san túrli jemis aǵashtary men kópjyldyq ósimdik túrleri ósiriledi. Búginge deıin 10 myńnan astam kóshetter egilgen. Saıabaqta sondaı-aq, jasandy kól bolady. Ártúrli gúlder otyrǵyzylyp, aıaqjoldar tóselip, jaryqshamdar ornatylǵan. Sýburqaqtar jáne jasandy kópirler salynǵan. Munda 200-ge jýyq jumysshy men 20 tehnıka jumyldyrylǵan.
ıAsaýı kesenesiniń aýmaǵy jasyl jelekke oranyp, Islam baǵyna aınalady. Ómirzaq Shókeev kesene aınalasyndaǵy botanıkalyq baqty abattyndyrý jumystarymen tanysty. Jeti gektar jer álemde sırek kezdesetin jasyl jelekke oranyp, ashyq tústi, hosh ıisti gúldermen kómkeriledi. Olar jyl 12 aı boıy gúldep turady.
Oblys basshysy «Kerýen saraı» kesheni aýmaǵynda iske asyp jatqan ınfraqurylym jumystaryn baqylaý barysynda birqatar tapsyrmalar berdi. Demalys aýmaǵyndaǵy 50 gektar jerdi abattandyryp, ınjenerlik ınfraqurylym júrgizilýde. Joldar jóndelip, sý jáne káriz júıesi jasalyp jatyr. Oblys ákimi mundaǵy abattandyrý men kógaldandyrý jumystarynyń bekitilgen kestege saı aıaqtalýyn mindettedi.
