Túrkistanda «Álem balalardyń kózimen» sýret kórmesi ashyldy
TÚRKІSTAN. QazAqparat - Búgin Túrkistan «Jastar resýrstyq ortalyǵynda» «Álem balalardyń kózimen» atty sýret kórmesi ashyldy. Onda Batys Qazaqstan oblysynyń estý jáne sóıleý qabiletteri nashar, zııatkerlik buzylystary bar balalarǵa arnalǵan arnaıy mektep-ınternattar tárbıelenýshileriniń jumystary qoıylǵan, dep habarlaıdy QazAqparat tilshisi.
Atalmysh shara «Aıalaǵan alaqan» qoǵamdyq qaıyrymdylyq qorynyń «Eriktiler jyly» aıasynda uıymdastyrylýda. Qoǵamnyń barlyq balalary daryndy ekenin kórsetý maqsatynda ótip jatqan sharada ónerli jasóspirimderdiń sýretteri qoıyldy. Onda balalar eshqandaı qıyndyqtarǵa nemese múmkindikteriniń shekteýligine qaramastan, álemge meıirimdi ári kirshiksiz taza kózderimen jáne oılarymen qaraıtynyn kórsetken. Osyny eskergen qoǵamdyq qor birneshe jyl qatarynan, aqysyz negizde jáne óz bastamasymen erekshe qajettilikteri bar balalarǵa sýret salýdy úıretip keledi. Jyl saıyn jas sýretshilerdiń jumystaryn tanystyratyn kórmeleri ótkiziledi. Aǵymdaǵy jyly balalardyń týyndylaryn kóptegen adamdarǵa kórsete otyryp, elimizdiń barlyq qalalaryn qamtý kózdelip otyr.
Túrkistan oblystyq «Jastar resýrstyq ortalyǵynyń» baspasóz hatshysy Qarashash Esenbaıdyń aıtýynsha, erekshe balalardyń shyǵarmalary ortalyqta birneshe kún ótedi.
«Ortalyqqa kelýshi jastar óte kóp. Olar kórmeni tamashalap, kartınalarmen tanysa alady. Qazirdiń ózinde túrkistandyq jastardyń alǵashqy legi kórmege keldi. Jalpy mundaı jobalardyń kóptep ótkizilýi erekshe jastardy yntalandyrady. Olardyń qoǵamnan alystamaýyna yqpal etip, kerisinshe qoǵamnyń basqa múshelerine shabyt syılaıdy», - deıdi Qarashash Esenbaı.
Al, kórmeniń uıymdastyrýshysy ári «Aıalaǵan alaqan» qorynyń jetekshisi Rada Haırýsheva kez kelgen janǵa jaqsylyq jasaý úshin kóp aqsha qajet emes, tek kómekke degen úlken yqylas, kóńil men qamqorlyq jáne kishkene bos ýaqyt kerek ekenin aıtady.
Aıta keteıik, búgingi kúnge deıin qor myńnan astam balany ártúrli baǵytta oqytqan jáne ol birneshe jyl boıy tegin júzege asyrylýda. Balalardyń mundaı sabaqtarǵa apta saıyn qatysýyna múmkindik jasalǵan. Úıirmelerge qajetti oqý quraldaryn qamqor azamattar jetkizip beredi.
