Túrkistanda alaıaq áıel stýdentterdi taqyrǵa otyrǵyzyp ketti
ShYMKENT. QazAqparat - Túrkistanda alaıaq áıel stýdentterdi jataqhanaǵa ornalastyramyn dep aldap, jarty mıllıonǵa jýyq teńgelerin alyp ketken. Qazirdiń ózinde 30 jastaǵy kelinshektiń 8 stýdentti taqyrǵa otyrǵyzǵany anyqtalyp otyr. Bul týraly qala prokýrory Rýslan Ábdiraıymov málimdedi, dep habarlaıdy QazAqparat HAA tilshisi.
Prokýrordyń sózinshe, kúdikti jastardyń senimine kirip, alaıaqtyqpen paıda taýyp otyrǵan.
«Jańa oqý jyly bastalýyna baılanysty 8 stýdentke jataxanadan oryn alyp beremin dep "M" esimdi 30-dan asqan áıel kisi árqaısynan 55 myń teńge shamasynda aqshasyn senimderine kirip, alyp alǵan. Áıeldiń jeke basy anyqtaldy. Kinásin moıyndaǵandyqtan jáne asyraýynda jas sábı bolýyna baılanysty oǵan bultartpaý sharasy qolxatta qaldyryldy. Sotqa deıingi tergep-tekserý barysynda kúdiktiniń basqa da qylmystarǵa qatystylyǵy anyqtalǵan jaǵdaıda, onyń bultartpaý sharasy qaıta qaralatyn bolady», - deıdi Túrkistan qalasynyń prokýrory.
Rýslan Ábdiraıymov sondaı-aq kıeli shahar turǵyndaryn kúndizgi saǵat 10.00 men 15.00 aralyǵynda qoǵamdyq kólikte júrgende abaı bolýǵa shaqyrady. Azamattarǵa uıaly telefondaryna uqypty bolý kerektigin eskertedi. Sebebi urlanǵan uıaly telefondardyń 68,5% dál osy ýaqytta oryn alatyny anyqtalǵan.
