Túrkistanda alaıaq áıel «múgedektikke shyǵaryp beremin» dep aldap, aqsha alǵan
TÚRKІSTAN. QazAqparat - Túrkistan qalasynda «múgedektikke shyǵaryp beremin» dep eldi aldaǵan kúdikti áıel ustaldy, dep habarlaıdy QazAqparat.
Túrkistan qalalyq polıtsııa basqarmasyna jergilikti turǵyn aryzdanyp keldi.
Jábirlenýshi áıeldiń aıtýynsha, ózine jaqyn tanys emes azamatsha «múgedektikke shyǵaryp beremin» dep 150 myń teńgesin alyp, aldap ketken.
Aradan birshama ýaqyt ótse de ol jábirlenýshige bergen ýádesin oryndamaǵan.
Múgedektikke shyqpaǵannan keıin, ne aqshasyn qaıtarmaǵan soń san soǵyp qalǵanyn túsingen turǵyn polıtsııanyń kómegine júgingen.
Túrkistan polıtseıleri atalǵan jaıtqa baılanysty tergep-tekserý amaldaryn bastap ketti.
Júrgizilgen jedel is-sharalardyń nátıjesinde qalalyq saqshylar kúdikti áıeldi anyqtaıdy.
Ol osy qalanyń buryn sotty bolǵan turǵyny bolyp shyqty. Atalǵan jaıt QR QK 190-babymen tirkelip, sotqa deıingi tergep-tekserý jumystary júrgizildi.
Kúdikti qolhatpen bosatylǵan.
Óz kezeginde Túrkistan oblysynyń polıtseıleri turǵyndarǵa alaıaqtardyń arbaýyna ermeı, kez kelgen máseleni zań júzinde sheshýdi eskertedi.
«Eger osyndaı alaıaqtardyń qylmysyna kýá nemese qurban bolsańyz, «102» shuǵyl nómirine habar berińiz, óıtkeni der kezinde berilgen aqparat qylmystyń tez ashylýyna yqpal etedi» deıdi polıtsııa.
